सरकारले नदीको अवस्था र जोखिमबारे हरेक घण्टा अध्यावधिक सूचना दिने

काठमाण्डौ - सरकारले पर्सि शुक्रबारदेखि तीन दिनसम्म नदीहरूको अवस्था र सम्भावित विपदको जोखिमका बारेमा हरेक घण्टा अध्यावधिक सूचना दिने भएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सम्भावित बाढी र पहिरोबाट हुने क्षतिको जोखिम घटाउन पूर्वसूचना प्रणालीलाई चुस्त बनाइएको हो । जल तथा मौसम विज्ञान विभाग र बाढी पूर्वानुमान महाशाखासँगको समन्वयमा नदीको अवस्था निरन्तर अनुगमन गरिने प्राधिकरणका कार्यकारी प्रमुख धर्मराज उप्रेतीले जानकारी दिनुभयो ।

सम्भावित जोखिमयुक्त क्षेत्रका नागरिकको मोबाइलमा एसएमएस अलर्ट पठाइने भएकाले त्यसलाई गम्भीरतापूर्वक लिन उहाँले आग्रह गर्नुभयो । तीव्र मौसमी फेरबदलका कारण उच्च हिमाली क्षेत्रमा अत्यधिक हिमपातको सम्भावना देखिएकाले रेड अलर्ट जारी गरिएको छ ।

जोखिमयुक्त क्षेत्रमा रहेका पर्यटकहरूलाई तत्काल सुरक्षित ठाउँमा जान र ट्राभल एजेन्सीहरूलाई नयाँ बुकिङ नगर्न एडभाइजरी जारी गरिएको छ । शुक्रबार र शनिबार अतिआवश्यक नपरी यात्रा नगर्न प्राधिकरणको आग्रह छ । यस्तै सडक खुलाउन मुख्य राजमार्गहरूमा डोजरहरू तयारी अवस्थामा राखिएको उहाँले बताउनुभयो । साथै, बाढी आएका बेला टिकटक बनाउन, भिडियो खिच्न वा खोलामा दाउरा सङ्कलन गर्न नजान प्राधिकरणले कडा चेतावनी दिएको छ ।

देशभरका सुरक्षा निकायलाई हाई अलर्टमा राखिएको र ७७ वटै जिल्लाका प्रमुख जिल्ला अधिकारीहरूमार्फत प्रतिकार्यको तयारी तीव्र पारिएको प्राधिकरणका कार्यकारी निर्देशक धर्मराज उप्रेतीले जानकारी दिनुभयो । यस्तै सरकारले पाकेको धान बाली र अन्न जोगाउन किसानहरूलाई विशेष सतर्कता अपनाउन आग्रह गरेको छ ।