भोटेकोशी बाढीबाट पाठ सिक्दै जलवायु न्यायमा जोड

काठमाण्डौ – मानव अधिकार तथा बालअधिकारको संरक्षणमा क्रियाशील सङ्घसंस्था तथा नागरिक सञ्जालका प्रतिनिधिले भोटेकोशी बाढीबाट पाठ सिक्दै विपद् पूर्वतयारी, उद्धार, राहत, पुनःस्थापना तथा प्रभावितको संरक्षणलाई प्रभावकारी बनाउनुपर्नेमा जोड दिएका छन् ।

जलवायु परिवर्तनका कारण बढ्दै गएको विपद्को जोखिम न्यूनीकरणसँगै विपद्का समयमा मानव अधिकारको संरक्षण र प्रवर्द्धनका लागि जलवायु शासनलाई प्रभावकारी बनाउनुपर्ने उनीहरूको भनाइ छ । हिजो अनौपचारिक क्षेत्र सेवा केन्द्र (इन्सेक), राष्ट्रिय मानव अधिकार तथा सामाजिक न्याय मञ्च (मानव अधिकार एलायन्स) र जागृति बाल तथा युवा सरोकार नेपाललगायत संस्थाको संयुक्त आयोजनामा काठमाण्डौमा भएको ‘जलवायु न्याय र मानव अधिकार’ विषयक संवादमा सहभागीले विपद् व्यवस्थापनलाई अधिकारमुखी बनाउनुपर्नेमा जोड दिएका हुन् ।

भोटेकोशी बाढीबाट भएको मानवीय तथा भौतिक क्षतिप्रति दुःख व्यक्त गर्दै सहभागीले बेपत्ताको खोजी, परिवार पुनर्मिलन, राहत तथा पुनःस्थापनाका कामलाई प्रभावकारी बनाउनुपर्ने बताएका थिए । मानव अधिकार एलायन्सका अध्यक्ष विदुर सुवेदीले ठूला देशका गतिविधिको असर नेपालजस्ता मुलुकले भोग्नुपरेको भन्दै जलवायु न्यायका लागि अन्तर्राष्ट्रियस्तरमा प्रभावकारी पैरवी आवश्यक रहेको बताउनुभयो ।

उहाँले मानव अधिकार र सामाजिक न्यायका विषयमा नेपालले गरेका राष्ट्रिय तथा अन्तर्राष्ट्रिय प्रतिबद्धता व्यवहारमा कार्यान्वयन गर्नुपर्ने बताउनुभयो । विपद् पूर्वतयारीमा प्रभावकारी समन्वय र सहकार्यको अभावले ठूलो जनधनको क्षति हुने गरेको उहाँको भनाइ थियो ।