एशियाली खेलकुद अन्तर्गत पुरुष ब्याडमिन्टनमा नेपाल इरानसँग पराजित

काठमाण्डौ – जापानमा चलिरहेको २०औँ एशियाली खेलकुदअन्तर्गत ब्याडमिन्टनको पुरुष एकलतर्फ नेपाली खेलाडी क्षितिज खनाल अन्तिम–३२ बाट बाहिरिएका छन् ।

चिनोमिया सिटी म्युनिसिपल जिम्नेसियममा हिजो भएको खेलमा क्षितिज इरानका निमा रोस्तामपुरलागाल्दानीसँग २–० को सोझो सेटमा पराजित भएका हुन् । क्षितिजले १४–२१ र ९–२१ को नतिजा व्यहोरे ।

क्षितिजले पहिलो चरणमा मकाओका ची चोन पुईलाई २–० ले पराजित गरेका थिए । एसियाली खेलकुदको ब्याडमिन्टनमा नेपाली खेलाडीको यो एकमात्र जित हो । महिला एकलतर्फ रशिला महर्जन र रिहाना महर्जन पनि पहिलो चरणबाटै बाहिरिएका थिए ।

रशिला चीनकी वाङ झी यीसँग तथा रिहाना श्रीलङ्काकी रणिथ्मा थिनुडी वेहेनागेसँग पराजित भएकी थिइन् । मिक्स्ड डबल्सतर्फ क्षितिज–रिहाना तथा प्रफुल महर्जन–रशिलाको जोडी पहिलो चरणमै रोकिएको थियो ।

पुरुष डबल्समा क्षितिज–प्रफुल तथा महिला डबल्समा रशिला–रिहानाको जोडीले पनि पहिलो चरण पार गर्न सकेनन् । पुरुष एकलतर्फ प्रफुल महर्जन श्रीलङ्काका डुमिन्डु अबेविक्रमसँग पराजित हुँदै पहिलो चरणबाटै बाहिरिएका थिए ।