नारायणीको बाढीले बगाएको गैँडा सुस्तामा भेटियो

रासस

सोमबार, असोज १२, २०८३

नारायणीको बाढीले बगाएको गैँडा सुस्तामा भेटियो

काठमाण्डाै – नारायणी नदीमा आएको भीषण बाढीका कारण चितवन राष्ट्रिय निकुञ्जबाट बगेको एउटा गैँडा नवलपरासीको सुस्तामा भेटिएको छ ।

सुस्ता गाउँपालिका–४ मा आज बिहान झन्डै ५ वर्षको गैँडा फेला परेको हो । निकुञ्जका सूचना अधिकारी अविनास थापामगरका अनुसार गैँडाको निरन्तर निगरानी भइरहेको छ र उसलाई समातेर सुरक्षित रूपमा निकुञ्ज फर्काउने तयारी भइरहेको छ ।

भौगोलिक जटिलताका कारण भारतीय बाटो वा डुङ्गा प्रयोग गरी गैँडाको उद्धार गरिनेछ । बाढीले अन्य वन्यजन्तुलाई पनि भारततर्फ पुर्‍याएको हुन सक्ने अनुमान छ ।

यसअघि २०७४ सालको ठूलो बाढीमा बगेर भारत पुगेका १२ वटा गैँडाको सफल उद्धार गरिएको थियो ।

प्रकाशित मिति: सोमबार, असोज १२, २०८३ १७:४७