ट्रम्प–सी भेटवार्तापछि अमेरिका र चीनद्वारा ३० अर्ब डलरका वस्तुमा भन्सार कटौती

अमेरिका र चीनले करिब ३० अर्ब अमेरिकी डलर बराबरका वस्तुमा भन्सार कटौती गर्ने सूची सार्वजनिक गरेका छन् ।

अमेरिका र चीनबीच व्यापारिक तनाव कम गर्ने प्रयासस्वरूप यस्तो निर्णय गरिएको एपीले जनाएको छ । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच वासिङ्टनमा भेटवार्ता भएको केही दिनपछि नयाँ सूची सार्वजनिक गरिएको हो ।

चीनले अमेरिकाबाट आयात गर्ने कृषि उपज, चिकित्सा उपकरण, काठ र कोइलालगायत एक हजार ६१९ प्रकारका वस्तुमा भन्सार घटाउनेछ । अमेरिकाले चीनबाट आयात गर्ने ७७ वर्गका वस्तु, जसमा आतिशबाजी, भान्साका सामग्री, काठ तथा सिसाका सजावटी सामान र फुटबललगायतमा भन्सार कटौती गर्नेछ ।

यो नयाँ व्यवस्थाले दुई देशबीच व्यापारिक सहयोग बढाउन सहयोग पुग्ने चिनियाँ वाणिज्य मन्त्रालयले जनाएको छ । अमेरिकी अधिकारीहरूले पनि यसबाट अमेरिकी किसान, उत्पादक र व्यवसायीलाई चिनियाँ बजारमा थप पहुँच पुग्ने बताएका छन्।

तर चिप, विद्युतीय गाडी र ब्याट्रीजस्ता रणनीतिक महत्वका क्षेत्र भने नयाँ भन्सार कटौतीमा समेटिएका छैनन् । विशेषज्ञहरूले भन्सार घटेपछि दुई देशबीच व्यापार बढ्न सक्ने भए पनि समग्र आर्थिक प्रभाव तत्काल सीमित हुन सक्ने जनाएका छन्।