फिफाको निलम्बनका कारण नेपाल पहिलो पटक साफ च्याम्पियनसिपबाट बाहिर

काठमाण्डौ – नेपाली राष्ट्रिय फुटबल टोलीले दक्षिण एशियाली फुटबलको सबैभन्दा ठूलो क्षेत्रीय प्रतियोगिता साफ च्याम्पियनसिपको आउँदो संस्करण गुमाउने निश्चित भएको छ ।

दक्षिण एशियाली फुटबल महासंघले नेपाललाई प्रतियोगितामा सहभागी गराउन दिएको अन्तिम समयसीमा हिजो सकिएपछि नेपालको सहभागिता औपचारिक रूपमा टुंगिएको हो ।

बंगलादेशमा अबको १ महिनापछि नोभेम्बर ५ देखि १७ तारिखसम्म हुने १५औँ साफ च्याम्पियनसिपको समूह विभाजनमा यसअघि नै नेपाललाई समावेश गरिएको थिएन । फिफाले गएको असारमा एन्फालाई निलम्बन गरेको थियो ।

राष्ट्रिय खेलकुद परिषद्को हस्तक्षेपलाई तेस्रो पक्षको हस्तक्षेपका रूपमा व्याख्या गर्दै फिफाले एन्फामाथि कारबाही गरेको हो । फिफाले निलम्बन फुकुवाका लागि एन्फाको स्वायत्तता कायम गर्नुपर्ने र एन्फाले आफ्नो विधानअनुसार निर्वाचन प्रक्रिया अघि बढाउन पाउनुपर्ने विषयलाई मुख्य सर्तका रूपमा अघि सारेको छ । तर एन्फा र सरकारी निकायबीचको विवाद समाधान हुन नसक्दा निलम्बन कायमै छ । यसको प्रत्यक्ष असर अब साफ च्याम्पियनसिपमा परेको छ ।

साफको स्थापना भएयता नेपालले पहिलोपटक यो प्रतियोगिता गुमाउन लागेको हो । यसअघि नेपालले साफ च्याम्पियनसिपका सबै संस्करणमा सहभागिता जनाउँदै आएको थियो ।

एन्फामाथिको फिफा निलम्बनको प्रत्यक्ष असर नेपाली राष्ट्रिय फुटबल टोलीको अन्तर्राष्ट्रिय सहभागितामा परेको छ । साफ च्याम्पियनसिप गुमेसँगै नेपालले यो वर्षको महत्वपूर्ण क्षेत्रीय फुटबल प्रतियोगिताबाट समेत बाहिरिनुपरेको छ ।