विपद‍्बारे अध्ययन गर्न राष्ट्रियसभामा पनि संसदीय समिति गठन

काठमाण्डाै – राष्ट्रियसभाले भोटेकोशी र कालीगण्डकी विपद् अध्ययन तथा अनुगमनका लागि ९ सदस्यीय संसदीय विशेष समिति गठन गरेको छ ।

अध्यक्ष नारायणप्रसाद दाहालको प्रस्तावमा गठन भएको समितिमा गीता देवकोटा, घनश्याम रिजाल, श्रीकृष्णप्रसाद अधिकारी, सम्झना देवकोटा, सोमनाथ पोर्तेल, पूजा चौधरी र तुलप्रसाद विश्वकर्मा चयन हुनुभएको छ । बाँकी एक सदस्य पछि थपिनेछन् ।

गएको भदौ १० गते भोटेकोशी र यही असोज ९ देखि ११ गतेसम्म कालीगण्डकीमा आएको विनाशकारी बाढीले पुर्‍याएको क्षतिको अध्ययन गर्न समिति गठन भएको हो ।

समितिलाई छिमेकी देशहरूसँग विपद् व्यवस्थापन र पूर्वसूचना प्रणाली विकासमा सहकार्य गर्ने, विज्ञहरूसँग छलफल गरी जोखिम न्यूनीकरणका उपाय पहिचान गर्ने र स्रोतसाधन आदानप्रदानका लागि उपयुक्त मोडालिटी तयार पार्ने कार्यादेश दिइएको छ ।

भोटेकोशी बाढी अध्ययनका लागि प्रतिनिधिसभाले पनि १५ सदस्यीय विशेष समिति गठन गरिसकेको छ ।