एशियाली खेलकुद क्रिकेट : पाकिस्तानलाई हराउँदै भारतले जित्याे स्वर्ण पदक

काठमाण्डाै – जापानमा चलिरहेको २०औँ संस्करणको एशियाली खेलकुदअन्तर्गत पुरुष क्रिकेटको स्वर्ण पदक भारतले जितेको छ ।

निशिनमा रहेको करोगी स्पोर्ट्स पार्कमा आज भएको फाइनलमा भारतले पाकिस्तानलाई १९ रनले हरायो ।

भारतले दिएको २१२ रनको लक्ष्य पछ्याएको पाकिस्तानले २० ओभरमा ६ विकेट गुमाएर १९२ रन बनायो । पाकिस्तानका हसन नवाजले ९६ रन बनाए । भारतका अक्षर पटेल, वाशिङ्गटन सुन्दर र शिवम दुवेले २/२ विकेट लिए ।

यसअघि टस जितेर ब्याटिङ गरेको भारतले २० ओभरमा ६ विकेट गुमाएर २११ रन बनायो । भारतका अभिषेक शर्माले ६१, तिलक वर्माले ५१ रन बनाए । पाकिस्तानका अहमद दानियाल र अराफत मिन्हासले २/२ विकेट लिए ।

भारतले एशियाली खेलकुदको पुरुष क्रिकेटमा लगातार स्वर्ण पदक जितेको हो । योसँगै पाकिस्तानले रजत पदक जितेको छ ।

यस्तै आज बिहान भएको पुरुष क्रिकेटको कांस्य पदक प्रतिस्पर्धामा श्रीलङ्काले बङ्गलादेशलाई हराएको छ । श्रीलङ्काले बङ्गलादेशलाई ६३ रनले हरायो ।

एशियाली खेलकुद पुरुष क्रिकेटमा नेपाल क्वाटरफाइनलमा पुगे पनि श्रीलङ्कासँगको खेल वर्षाका कारण हुन नसकेपछि बाहिरिएको थियो ।