प्रसारण र वितरण लाइन मर्मत गरी मुस्ताङ र अन्नपूर्णमा विद्युत् आपूर्ति नियमित

काठमाण्डौ – पछिल्लो झरि र बाढीरपहिरोबाट प्रभावित बनेको म्याग्दीको अन्नपूर्ण गाउँपालिका र मुस्ताङमा विद्युत् आपूर्ति नियमित गरिएको छ ।

गएको असोज ८ देखि ११ गतेसम्मको ठूलो वर्षाले कालीगण्डकी नदीमा बाढी आउँदा म्याग्दीको अन्नपूर्ण गाउँपालिकाको पोखरेबगर, धिरच्याङ र दोवाको भिरकाटेमा २२० केभी क्षमताको दाना–खुर्कोट प्रसारण लाइनको चार वटा टावर ढलाएको र लाइन चुँडाएकाले मुस्ताङ जिल्ला र अन्नपूर्ण गाउँपालिकामा विद्युत् आपूर्ति बन्द थियो ।

अन्नपूर्ण गाउँपालिका–२, ३, ४ र ५ तथा मुस्ताङ जिल्लाभर कार्यक्षेत्र रहेको नेपाल विद्युत् प्राधिकरणको तातोपानी वितरण केन्द्रका प्रमुख हेमराज चापागाईंले प्रसारण लाइनको समस्याले तत्काल दाना सबस्टेसनबाट विद्युत् आपूर्ति गराउन सम्भव नभएकाले वैकल्पिक व्यवस्था गरी विद्युत् आपूर्ति गरिएको बताउनुभयो ।

मुस्ताङमा यसअघि नै आपूर्ति नियमित भएको र म्याग्दीमा एक/दुई घरबाहेक सबै ठाउँमा मर्मत कार्य सकिएको केन्द्रका प्रमुख चापागाईंले बताउनुभयो । विद्युत् आपूर्तिसँगै अवरुद्ध सञ्चार सेवा पनि सञ्चालनमा आएको छ ।

म्याग्दीका ४२ मेगावाट क्षमताको मिस्त्रीखोला, ११० मेगावाटको नीलगिरि, ६ मेगावाटको रेलेखोला र १४ मेगावाट क्षमताको घारखोला जलविद्युत् आयोजना भने बन्द छन् ।