घटस्थापनापछि काठमाण्डौ उपत्यकाबाट साढे तीन लाख यात्रु बाहिरिए

काठमाण्डौ – काठमाण्डौ उपत्यकाबाट दशैँ मनाउन गाउँघर फर्किने यात्रुको चाप बढ्न थालेको छ । काठमाण्डौमा अध्ययन, रोजगारी तथा विभिन्न पेशा व्यवसायमा संलग्न मानिस धमाधम गाउँ फर्कन थालेका हुन् ।

काठमाण्डौ उपत्यका ट्राफिक प्रहरी कार्यालयका प्रहरी नायब उपरीक्षक रविन्द्र खनालले दशैँ मनाउनका लागि घटस्थापनादेखि आज बिहानसम्म तीन लाख ४८ हजारभन्दा धेरै यात्रु काठमाण्डौ उपत्यकाबाट बाहिरिएको जानकारी दिनुभयो । उहाँका अनुसार असोज २५ गते ५२ हजार ८२७, असोज २६ गते ५६ हजार ८९०, असोज २७ गते ७८ हजार १३८, असोज २८ गते ७४ हजार ९७९ र असोज २९ गते हिजो ८५ हजार ५६१ यात्रु काठमाण्डौबाट बाहिरिएका छन् ।

काठमाण्डौबाट दशैँ मनाउनका लागि  फर्पिङ, नागढुङ्गा, थानकोट, भीमढुङ्गा, तीनपिप्ले, साँखु, भक्तपुरको जगाती र ललितपुरको भट्टेडाँडा नाका हुँदै यात्रु बाहिरिएका हुन् । दशैँका लागि घर फर्किने यात्रुको सङ्ख्या बढेसँगै यातायात व्यवसायीलाई यात्रु व्यवस्थापन गर्न समस्या परेको छ ।

नेपाल यातायात व्यवसायी राष्ट्रिय महासङ्घका कोषाध्यक्ष एवं नेपाल माइक्रोबस कम्पनीका अध्यक्ष राजेन्द्र आचार्यले सडक बाटोका कारण यातायात व्यवस्थापनमा समस्या भइरहेको बताउनुभयो । अहिलेसम्म एक लाख ५३ हजार ७३२ यात्रुले दशैँका लागि अग्रिम टिकट बुकिङ लिएका छन् ।     

महासङ्घले यात्रुलाई टिकट काटेर मात्र यात्रा गर्न, तोकिएको भाडा तिर्न र गाडीको अवस्था जाँच गरेर यात्रा गर्न आग्रह गरेको छ ।