फ्रान्सका राष्ट्रपतिद्वारा राष्ट्रका नाममा सम्बोधन : शान्ति कायम गर्न आह्वान

फ्रान्सका विभिन्न शहरमा विरोध प्रदर्शनका क्रममा दङ्गा, तोडफोड र लुटपाट भएपछि राष्ट्रपति इमानुएल म्याक्रोंनले देशमा शान्ति र सुव्यवस्था कायम गर्न आह्वान गर्नुभएको छ ।

राष्ट्रपति म्याक्रोंनले एलिसी दरबारबाट राष्ट्रका नाममा सम्बोधन गर्दै हिंसात्मक गतिविधि नगर्न प्रदर्शनकारीलाई आग्रह गर्नुभएको बीबीसीले जनाएको छ । उहाँले नागरिकको आक्रोश र असन्तुष्टिलाई बुझ्नुपर्ने बताउँदै शान्तिपूर्ण विरोध र तोडफोड तथा लुटपाटमा संलग्न व्यक्तिबीच फरक छुट्याउनु पर्नेमा जोड दिनुभएको छ ।

राष्ट्रपति म्याक्रोंनले हिंसालाई कुनै पनि अवस्थामा उचित ठहराउन नसकिने बताउँदै तोडफोड र लुटपाटमा संलग्न व्यक्तिले कानुनी कारबाहीको सामना गर्नुपर्ने चेतावनी दिनुभएको छ । फ्रान्सको आन्तरिक मन्त्रालयका अनुसार घटनामा संलग्न भएको आरोपमा प्रहरीले दुई हजार चार सय भन्दा धेरैलाई पक्राउ गरेको छ । प्रदर्शनका क्रममा कालो कपडा र अनुहार छोप्ने मास्क लगाएका केही समूहले गाडी तथा भवनमा आगजनी गरेका थिए । विभिन्न पसलमा लुटपाटसमेत भएको थियो ।

अस्ति शनिबार भएको विरोध प्रदर्शनका क्रममा राजधानी पेरिससहित मार्सेली र अन्य शहरमा हिंसात्मक घटना भएका थिए । हिजो पनि पेरिसका केही क्षेत्र अशान्त थिए । इन्धनको मूल्य वृद्धि, जीवनयापनको बढ्दो खर्च तथा विद्यालयलगायत सार्वजनिक सेवाको अवस्था कमजोर भएको भन्दै फ्रान्सभर झण्डै पाँच लाख ५० हजार मानिसले प्रदर्शन गरेका हुन् ।

शुरुमा शान्तिपूर्ण रूपमा भएको प्रदर्शनका क्रममा पछि केही ठाउँमा हिंसात्मक घटना भएका थिए ।