विद्यालय तहका बालबालिकालाई एआई साक्षरताको प्रमाणपत्र दिने इयूको योजना

युरोपेली सङ्घ (इयू)ले विद्यालय तहका बालबालिकालाई कृत्रिम बुद्धिमत्ता अर्थात् एआईसम्बन्धी ज्ञान र सीप प्रदान गर्न ‘एआई साक्षरता’ प्रमाणपत्र कार्यक्रम सञ्चालन गर्ने भएको छ ।

इयूले १५ वर्ष उमेरका विद्यार्थीलाई लक्षित गरी आउँदो वर्ष सन् २०२७/२०२८ को शैक्षिक सत्रदेखि नयाँ कार्यक्रम परीक्षण गर्ने योजना बनाएको एएफपीले उल्लेख गरेको छ ।

तीव्र गतिमा विकास भइरहेको कृत्रिम बुद्धिमत्ताले शिक्षा क्षेत्रमा पारिरहेको प्रभावलाई ध्यानमा राख्दै इयूले यस्तो योजना अघि सारेको हो ।

युरोपेली आयोगकी उपाध्यक्ष रोक्साना मिन्जाटुका अनुसार कार्यक्रमले विद्यार्थीलाई एआई कसरी काम गर्छ भन्ने बुझ्न, यसले दिने सूचनाको सत्यता जाँच्न, भ्रामक सामग्री पहिचान गर्न र आवश्यक पर्दा यसको प्रयोग रोक्न सक्ने क्षमता विकास गर्न सहयोग पुर्‍याउनेछ ।

विश्वभरका विद्यालयमा एआईको प्रयोग बढ्दै जाँदा यसको प्रभाव र चुनौतीबारे बहस भइरहेका बेला इयूले यस्तो पहल गर्न लागेको हो ।

इयूले आफ्ना २७ सदस्य देशको शिक्षा नीतिमा प्रत्यक्ष नियन्त्रण नगरे पनि बालबालिकालाई सुरक्षित र जिम्मेवार ढङ्गले एआई प्रयोग गर्न सिकाउने प्रयासलाई समर्थन गर्दै आएको छ ।

यसैबीच इयूले किशोरकिशोरीको सामाजिक सञ्जाल प्रयोग सीमित गर्ने कानुनी पहल पनि अघि बढाइरहेको छ ।