अमेरिकी मध्यावधि चुनावपछि विश्वभरका प्रविधि कम्पनीको शेयरमा ठूलो गिरावट

अमेरिकी मध्यावधि चुनावको नतिजा र कृत्रिम बुद्धिमत्ता अर्थात् एआई क्षेत्रमा लगानीको प्रतिफल घट्न सक्ने आशङ्काले विश्वभरका प्रविधि कम्पनीको शेयर बजारमा ठूलो गिरावट आएको छ ।

अमेरिकी प्रविधि बजारको प्रमुख सूचक न्यास्ड्याक ५.५ प्रतिशतभन्दा धेरै घट्दा एकैदिन झन्डै २५ खर्ब अमेरिकी डलर अर्थात् झन्डै ३ हजार ७७१ खर्ब ७५ अर्ब रुपैयाँ बराबरको बजार मूल्य गुमेको छ ।

एनभिडिया, एएमडी, इन्टेल र सामसङजस्ता प्रमुख कम्पनीका शेयरमा पनि ठूलो गिरावट आएको छ । जापान, दक्षिण कोरिया र ताइवानका शेयर बजारसमेत प्रभावित भएका छन् ।

विश्लेषकहरूका अनुसार एआई पूर्वाधार निर्माणमा भइरहेको अत्यधिक खर्च, डेटा सेन्टर निर्माणमा सम्भावित सरकारी नियन्त्रण र लगानीबाट अपेक्षित प्रतिफल नआउने चिन्ताले बजारमा दबाव बढाएको हो ।

डेमोक्र्याटहरूले डेटा सेन्टर विस्तार र एआई विकासमा कडा निगरानीको पक्षमा आवाज उठाएपछि लगानीकर्ताको चिन्ता थप बढेको छ ।

यस घटनाले विश्व प्रविधि बजारमा एआईको भविष्य र त्यसमा भइरहेको ठूलो लगानीको प्रतिफलबारे नयाँ बहस सिर्जना गरेको छ ।