ललितपुरको सानेपामा आगलागी

ललितपुर - ललितपुरको सानेपामा गएराति आगलागी भएको छ । राति झण्डै ९ बजेतिर ललितपुर महानगरपालिका–३ सानेपामा रहेको कागज गोदाममा आगलागी भएको जिल्ला प्रहरी परिसर ललितपुरले जनाएको छ।  

प्रहरीका अनुसार आगलागी भएको सूचना पाएलगत्तै प्रहरी, स्थानीय र दमकलको सहयोगमा आगो नियन्त्रणको प्रयास गरिएको थियो । लामो प्रयासपछि आज बिहान करिब ३ बजे आगो नियन्त्रणमा आएको जिल्ला प्रहरी परिसर ललितपुरका प्रहरी उपरीक्षक (एसपी) गौतम मिश्रले जानकारी दिनुभयो । 
आगलागी नियन्त्रणका लागि १० वटा दमकल र एउटा जेसीबी प्रयोग गरिएको थियो । कागज गोदाममा आगलागीको कारण भने अहिलेसम्म खुल्न सकेको छैन ।  घटनाबाट भएको भौतिक क्षतिको विवरण पनि आउन बाँकी रहेको एसपी मिश्रले बताउनुभयो ।