४० करोड डलरको क्रिप्टो ह्याक गर्न नक्कली भिडियो कलको प्रयोग

अमेरिकी अधिकारीहरूले ४० करोड अमेरिकी डलर ६० अर्ब ३२ करोड रुपैयाँभन्दा धेरै मूल्यको क्रिप्टोकरेन्सी चोरी हुनुमा उत्तर कोरियाली सरकार समर्थित ह्याकरहरूको हात रहेको दाबी गरेका छन् ।

ह्याकरहरूले नक्कली भिडियो कलको प्रयोग गरी मानिसहरूको पहिचान चोरेर क्रिप्टोकरेन्सी हात पारेका अधिकारीहरूलाई उद्धृत गर्दै बीबीसीले जनाएको छ ।

अमेरिकी सङ्घीय अनुसन्धान ब्युरो (एफबीआई) का अनुसार विगत १८ महिनामा ९०० भन्दा धेरै मानिसहरू यस ठगीमा परेका छन् । अनुसन्धान निकायले ठगीको यो तरिकालाई ‘फेसस्टिलर’ नाम दिएको छ ।

उत्तर कोरियाली शासनले आफ्नो अवैध हतियार कार्यक्रमलाई सघाउन क्रिप्टोकरेन्सीको ठूलो परिमाणमा हुने चोरीबाट प्राप्त रकममा निर्भर रहने गरेको एफबीआईका साइबर निर्देशक ब्रेट लेदरम्यानले बताउनुभएको छ । पछिल्ला वर्षहरूमा अर्बाैँ डलर चोरी भएको छ ।

यो घटनाक्रम विश्वको सबैभन्दा ठूलो क्रिप्टो एक्सचेन्ज ‘बाइनान्स’ ले दाबीहरू गरेको एक हप्तापछि आएको हो । ह्याकरहरूले नक्कली जागिर अन्तर्वार्तामार्फत ६ अर्ब ३० करोड अमेरिकी डलर अर्थात् साढे ९ खर्ब रुपैयाँको कीर्तिमानी रकम चोरेका कम्पनीले जनाएकाे छ ।

अमेरिकी कानून कार्यान्वयन निकायहरूले ‘बाइनान्स’ मा भएको यस आक्रमणका लागि उत्तर कोरियासँग जोडिएका ह्याकरहरूलाई जिम्मेवार ठहर्‍याएका छन् ।

यसलाई अहिलेसम्मकै सबैभन्दा ठूलो क्रिप्टो ह्याक मानिएको छ । यद्यपि उत्तर कोरियाले यो आरोप अस्वीकार गरेको छ ।