सार्वभौम क्रेडिट रेटिङमा नेपालले फेरि ‘बीबी माइनस’ पायाे

काठमाण्डाै – अन्तर्राष्ट्रिय रेटिङ एजेन्सी फिचले नेपालको सार्वभौम क्रेडिट रेटिङ ‘बीबी माइनस’ मै कायम राखेको छ ।

फिचले नेपालको भविष्यको आर्थिक तथा वित्तीय अवस्थालाई हेर्दै आउटलुक पनि स्थिर राखेको हो । नेपालले विसं २०८१ मङ्सिर ७ गते पहिलो पटक र विसं २०८२ मङ्सिर २ गते दोस्रो पटक यही साख पाएको थियो ।

भर्खरै सार्वजनिक प्रतिवेदनमा फिचले नेपालको न्यून सरकारी ऋण, बलियो विदेशी मुद्रा सञ्चिति र रेमिट्यान्स आप्रवाहलाई सकारात्मक पक्षका रूपमा उल्लेख गरेको छ ।

जलविद्युत् क्षेत्रको सम्भावना र बहुपक्षीय विकास साझेदारबाट प्राप्त हुने सहुलियतपूर्ण वित्तीय सहयोगले पनि नेपालको ऋण तिर्न सक्ने क्षमतालाई बलियो बनाएको फिचको निष्कर्ष छ । तर कमजोर सुशासन, न्यून प्रतिव्यक्ति आय, सीमित आर्थिक विकास र प्राकृतिक विपद्को जोखिमका कारण नेपालको रेटिङमा सुधार हुन नसकेको फिचको रिपोर्टले देखाएको छ ।

फिचका अनुसार चालू आर्थिक वर्ष २०८३/८४ मा नेपालको आर्थिक वृद्धि ३.४ प्रतिशतमा सीमित हुने अनुमान छ । अघिल्लो आर्थिक वर्षमा ३.९ प्रतिशत आर्थिक वृद्धि भएको थियो ।

भदौमा आएको बाढीले जलविद्युत् आयोजना, प्रसारण लाइन, सडक यातायात, पर्यटन र औद्योगिक गतिविधिमा असर पारेको प्रतिवेदनमा उल्लेख छ । यद्यपि पुनर्निर्माण र पूर्वाधार पुनर्स्थापनाको कामले आउँदा दिनमा अर्थतन्त्रले गति लिने अपेक्षा गरिएको छ ।

फिचले आर्थिक वर्ष २०८४/८५ मा नेपालको आर्थिक वृद्धि ५.२ प्रतिशत पुग्ने प्रक्षेपण गरेको छ । नेपालको बाह्य क्षेत्रलाई रेमिट्यान्सले ठूलो भरथेग गरिरहेको फिचले औँल्याएको छ ।

फिचकाअनुसार नेपालको सार्वजनिक ऋण आर्थिक वर्ष २०८४/८५ सम्ममा कुल गार्हस्थ्य उत्पादन (जीडीपी) को ४८.२ प्रतिशत पुग्नेछ । आर्थिक वर्ष २०८२/८३ मा यो अनुपात ४५.२ प्रतिशत थियो । बाढीपछिको पुनर्निर्माण, राजस्व सङ्कलनमा पर्न सक्ने असर र सरकारी खर्च बढ्ने भएकाले ऋणको अनुपात बढ्ने अनुमान गरिएको हो ।

नेपालको सरकारी ऋण ‘बीबी’ समूहका देशहरूको औसत ५२.७ प्रतिशतभन्दा कम रहने भएकाले तत्काल ठूलो वित्तीय जोखिम नरहेको फिचको निष्कर्ष छ ।

नेपालमा राजनीतिक स्थिरता र नीतिगत सुधारको सम्भावना बढेको फिचले निष्कर्ष निकालेको छ । फिचले नेपालको बैंकिङ क्षेत्रमा खराब कर्जाको समस्या बढ्दै जानुलाई चिन्ताको विषय भएको बताएको छ ।

सन् २०२६ सेप्टेम्बरको मध्यसम्म बैंक तथा वित्तीय संस्थाको निष्क्रिय कर्जा अनुपात ५.७ प्रतिशत पुगेको छ ।

– न्युज एजेन्सी नेपाल