नेभिगेशन
सोमबार, कात्तिक ३०, २०८३

हवाई ट्राफिक नियन्त्रण प्रणालीमा समस्या आएपछि अमेरिकामा तीन दिनमै ४१ हजारभन्दा बढी उडान प्रभावित

अमेरिकामा हवाई उडान अवरुद्ध हुने क्रम तीन दिनसम्म चलिरहँदा ४१ हजारभन्दा बढी उडान प्रभावित भएका छन् ।

अमेरिकी संघीय उड्डयन प्रशासन (एफएए) को प्राविधिक प्रणालीमा आएको समस्याका कारण शुक्रबारदेखि शुरु भएको हवाई अवरोध हिजो आईतबारसम्म पनि पूर्ण रूपमा समाधान हुन सकेन ।

रोयटर्सका अनुसार हिजो मात्रै अमेरिकामा २ हजार ३०० भन्दा बढी उडान रद्द भएका छन् भने झण्डै ७ हजार ७०० उडान ढिलाइ भएका छन् । यो सहित हिजो मात्रै १० हजारभन्दा बढी उडान प्रभावित भएका हुन् ।

यसअघि अस्ति ६ हजार ४०० भन्दा बढी उडान रद्द भएका थिए भने ८ हजारभन्दा बढी उडान ढिलाइ भएका थिए । शुक्रबार भएको राष्ट्रव्यापी उडान रोकावटका कारण झण्डै १० हजार उडान रद्द भएका थिए ७ हजार ५०० उडान ढिलाइ भएका थिए ।

तीन दिनमा करिब १७ हजार ९०० उडान रद्द भएका छन् भने २३ हजार २०० उडान ढिलाइ भएका छन् । यसअनुसार तीन दिनमा कुल ४१ हजार १०० भन्दा बढी उडान प्रभावित भएका छन् । उडान अवरुद्ध हुनुको मुख्य कारण एफएएको हवाई ट्राफिक नियन्त्रण प्रणालीमा आएको प्राविधिक समस्या रहेको प्रारम्भिक अनुसन्धानले देखाएको छ ।

यो समस्या समाधान भएपछि पनि विमानस्थलहरूमा यात्रुको चाप र उडान तालिका व्यवस्थापनमा ठूलो चुनौती हुने देखिएको छ । 


 

प्रकाशित मिति:
थप विश्व