नेभिगेशन
शनिबार, मंसिर ५, २०८३

सिन्धुलीका किसानलाई मौरीपालन तालिम

काठमाण्डौ – कृषि विकास कार्यालय सिन्धुलीले १८ जना किसान छनोट गरी चितवनमा रहेको मौरीपालन विकास केन्द्र भण्डारामा तीन दिने तालिम गरेको छ ।

गएको २ गतेदेखि शुरु भएको तालिम हिजो समापन गरिएको तालिक संयोजक उमादेवी श्रेष्ठले जानकारी दिनुभयो । कृषि विकास कार्यालय सिन्धुलीको आयोजना तथा मौरीपालन विकास केन्द्र भण्डाराको प्राविधिक सहयोगमा मौरीपालन सम्बन्धि अगुवा किसानलाई तालिम प्रदान गरिएको हो ।

मौरीपालन विकास केन्द्रका प्रमुख सुजन अमगाईसहित प्रशिक्षकहरू कालुराम दहित, राजेशप्रसाद यादव, प्रजु घिमिरे, प्रविणा श्रेष्ठ र कमलनयन पन्तले प्रशिक्षण दिनुभएको थियो । मौरीपालन विकास केन्द्रका प्रमुख अमगाईका अनुसार तालिममा सहभागीलाई मौरीपालनको महत्व, सम्भावना र चुनौती, आधुनिक घार तथा उपकरणको प्रयोग, मौरीगोला निरीक्षण, लुटलटाई व्यवस्थापनलगायतका बारेमा सैद्धान्तिक तथा व्यवहारिक ज्ञान दिइएको थियो ।

त्यसैगरी, कृत्रिम आहार व्यवस्थापन, परम्परागत घरबाट आधुनिक घारमा गोला सार्ने तरिका, परागसेचन र विषादीको असर, मौरीचरण पात्रो निर्माण, गोला समायोजन तथा विभाजन र मौरीमा लाग्ने रोग तथा किराको पहिचान र व्यवस्थापनका विषयमा समेत प्रशिक्षण दिइएको छ ।

कृषि विकास कार्यालय सिन्धुलीका प्रमुख अनुप अधिकारीले सिन्धुलीमा मौरीपालन व्यवसाय थप विस्तार र सुढृढ गर्ने, किसानलाई प्राविधिक ज्ञान र क्षमता वृद्धि गर्ने उदेश्यले तालिम आयोजना गरेको बताउनुभयो ।

प्रकाशित मिति:
थप समाज