महोत्तरी – बर्दिवास नगरपालिकामा रहेको होटल शीशमहलमा नगर उपमेयर कृष्णमाया गौतमलाई खान दिइएको चाउमिन (खाजा) बासी र सडेको भेटिएको छ ।

होटलमा शुक्रबार दिउँसो नगर बाल सञ्जालको आयोजना, सेभ द चिल्ड्रेनको आर्थिक सहयोग तथा सामुदायिक परिवार संघ महोत्तरीको साझेदारीमा बालिका दिवसको अवसरमा बालिका संरक्षणसम्बन्धी साझा संवाद कार्यक्रममा नगर उपमेयर गौतमलाई खान दिइएको खाजा यस्ताे भेटिएको हो ।  

चाउमिन दुर्गन्धित र सडेको भेटिएपछि खाजा नखाइ उपमेयर लगायत बालबालिका र अन्य सहभागी कायक्रमबाट बाहिरिएका थिए । 

उपमेयरको संयोजकत्वमा नगरपालिकाले चाडपर्वलाई लक्षित गरी बजार अनुगमन गरे पनि त्यसको प्रभावकारिता खासै नदेखिएको यो घटनाले पुष्टि गर्छ । घटनाको विषयमा सत्य, तथ्य छानबिन गरी दोषी ठहरिए तीन दिनभित्र कडा कारबाही गरिने उहाँले बताउनुभयो । 

साथै अखाद्य वस्तु बिक्री गर्ने होटल शीशमहलका सञ्चालक दिपेन्द्र पराजुली राष्ट्रिय उपभोक्ता मञ्च महोत्तरीका अध्यक्ष हुनुहुन्छ । साथै उहाँ बर्दिवास नगरपालिकाको बजार अनुगमन समितिको सदस्य पनि हुनुहुन्छ ।