कास्की - कास्कीको क्षेत्र नम्बर २ मा मंसिर १४ गतेका लागि तय भएको उपचुनावमा नेपाल कम्युनिष्ट पार्टीले स्व.रवीन्द्र अधिकारीकी श्रीमती विद्या भट्टराईलाई उम्मेद्वार बनाउने भएको छ ।  

शुक्रबार नेकपा जिल्ला कमिटी बैठकले उनलाई सर्वसम्मत रुपमा केन्द्रमा सिफारिस गर्ने निर्णय गरेको हो   नेकपा केन्द्रीय कार्यालयले कास्की क्षेत्र नम्बर २ मा हुने उपचुनावमा आकांक्षी उम्मेद्वारहरुको नामावली पठाउन जिल्ला पार्टी कमिटीलाई पत्राचार गरेको थियो । 

पार्टीको जिल्ला कमिटीको शुक्रबार बसेको बैठकले सर्वसम्मद उम्मेद्वारको रुपमा भट््टराईलाई सिफारिस गर्ने निर्णय गरेको नेकपा कास्कीका अध्यक्ष कृष्ण थापाले बताउनुभयो ।  

क्षेत्र नम्वर २ बाटै विजयी बन्दै संस्कृति पर्यटन तथा नागरिक उड्डयन मन्त्री बन्नुभएका स्व.रवीन्द्र अधिकारीको उत्तराधिकारीको रुपमा पत्नी भट्टराईलाई उम्मेद्वार बनाउन सिफारिस गरिएको नेकपा कास्कीले जनाएको छ ।  

केही समय अगाडि नेकपाका प्रभावशाली नेता बामदेव गाैतम कास्की २ बाट चुनाव लड्ने चर्चा चलेको थियो ।  पछि उहाँ उपचुनावमा नउठ्ने भएपछि धेरै जनाको नाम चर्चामा रहे पनि भट्टराईलाई सर्वसम्मत रुपमा सिफारिस गरिएकाे हो । भट्टराईलाई सर्वसम्मत रुपमा नै सिफारिस गरिएको नेकपा कास्कीका अध्यक्ष कृष्ण थापाले जानकारी दिनुभयो । 

गएकाे फागुन १५ गते पर्यटन मन्त्री रवीन्द्र अधिकारीको हेलिकप्टर दुर्घटनामा परि निधन भएको थियो । उहाँको निधनपछि रिक्त कास्की २ मा मंसिर १४ मा उपचुनाव हुँदैछ ।

पार्टीले जित्नै पर्ने दबाब रहेकाले चर्चित नेता अधिकारीकी श्रीमतीलाई नै उम्मेद्वार बनाउन सिफारिस गरिएको हो । यसअघि साझा पार्टीले कास्की २ को उम्मेद्वारको रुपमा रजनी केसीलाई उम्मेद्वार बनाउने घोषणा गरिसकेको । 

कांग्रेसले भने उम्मेद्वार चयन गर्न सकेको छैन । कांग्रेस जिल्ला कार्यसमितिले उम्मेद्वार बन्न आकांक्षी १६ जनाको नाम केन्द्रमा सिफारिस गरी पठाएको छ ।