काठमाण्डौ – राष्ट्रिय मानवअधिकार आयोगले सहकारीपीडित बचतकर्ताको माग सम्बोधन गर्न सरकारसँग आग्रह गरेको छ । शान्तिपूर्ण प्रदर्शन तथा सभा सम्मेलन गर्न पाउने नागरिकको संविधानप्रदत्त अधिकारलाई संरक्षण गर्न र अध्ययन समितिले गएको भदौमा प्रधानमन्त्री पुष्पकमल दाहाल प्रचण्डलाई पेश गरेको प्रतिवेदनको तत्काल कार्यान्वयन गरी पीडित बचतकर्ताको माग सम्बोधन गर्न आयोगले आग्रह गरेको हो ।

सहकारीपीडित बचतकर्ताले काठमाण्डौमा आन्दोलन गर्दै आएका छन् । गएको चैत १ गते शान्तिपूर्ण प्रदर्शनका क्रममा प्रहरीबाट भएको बल प्रयोगले केही प्रदर्शनकारी घाइते भएको अवस्थाप्रति आयोगले ध्यानाकर्षण भएको समेत जनाएको छ ।

सहकारीपीडितको  प्रदर्शन, सुन्धारामा भएको र्‍याली तथा भृकुटीमण्डपमा गरिएको कोणसभाको आयोगले अनुगमन गरेको आयोगका प्रवक्ता डा.टीकाराम पोखरेलले जानकारी दिनुभयो । सहकारी बचतकर्ता संरक्षण राष्ट्रिय अभियानका अध्यक्ष कुशलव केसीलगायत केही व्यक्तिलाई प्रहरीले कुटपिट गरी घाइते बनाएको आयोगमा उजुरी समेत दर्ता भएको छ ।

अभियानका अध्यक्ष केसी गएको चैत १ गतेदेखि अनशनमा हुनुहुन्छ । उहाँको स्वास्थ्य अवस्था जटिल बन्दै गएको छ । आयोगले अनशनरत केसीको स्वास्थ्य अवस्थालाई ध्यान दिन, वार्ता र सम्वादको माध्यमबाट सहकारीपीडितको समस्याको समाधान गर्न आग्रह गरेको छ ।