कांग्रेस संस्थापन इतरको राष्ट्रिय भेलाका लागि ५५१ सदस्यीय मूल आयोजक समिति गठन

काठमाण्डौ — नेपाली कांग्रेसको संस्थापन इतर समूहले राष्ट्रिय भेलाका लागि ५५१ सदस्यीय मूल आयोजक समिति गठन गरेको घोषणा गरेको छ ।

आज सम्पर्क कार्यालय चुनदेवीमा पत्रकार सम्मेलन गरेर काँग्रेस इतर पक्षले डा. शशांक कोइरालाको संयोजकत्वमा आयोजक समिति गठन गरेको जानकारी दिइएको हो । राष्ट्रिय भेलालाई व्यवस्थित रूपमा सम्पन्न गर्न समिति र भेलाका लागि आवश्यक अन्य विभिन्न उपसमितिहरू गठन गरेको नेता मीनबहादुर विश्वकर्माले जानकारी दिनुभयो ।

आयोजक समितिमा पार्टीका १४औँ महाधिवेशनबाट निर्वाचित केन्द्रीय पदाधिकारी, सदस्यहरू, प्रदेश कार्यसमितिका सभापति एवं पदाधिकारी, जिल्ला सभापतिहरू, उपत्यकाभित्रका जिल्ला कार्यसमिति पदाधिकारीहरू, महानगर तथा नगर सभापतिहरू समावेश गरिएको नेता विश्वकर्माले जानकारी दिनुभयो ।

राष्ट्रिय भेलालाई नीतिगत र व्यवस्थापकीय रूपमा सफल बनाउन विभिन्न १६ वटा विषयगत समितिहरू समेत गठन गरिएको छ । मूल आयोजक समिति बाहेकका अन्य विषयगत समितिहरूको नेतृत्व र सदस्यहरूको चयन आउँदो केन्द्रीय कार्यसमितिको बैठकबाट टुङ्गो लगाइने विश्वकर्माले बताउनु भयो ।