साउदी अरब, पाकिस्तान र टर्किएबीच रक्षा सम्झौतामा हस्ताक्षर

अमेरिका र इरानबीचको युद्धको पृष्ठभूमिका साउदी अरब, पाकिस्तान र टर्किएले संयुक्त रक्षा सम्झौतामा हस्ताक्षर गरेका छन् ।

साउदी अरबको मक्का शहरमा साउदी युवराज मोहम्मद बिन सलमान, पाकिस्तानका प्रधानमन्त्री शहबार शरिफ र टर्किएका राष्ट्रपति रेसेप तैयप एर्दोगानबीच आज भएको बैठकमा रक्षा सम्झौताको घोषणा भएको बीबीसीले जनाएको छ ।

मध्यपूर्वको द्वन्द्वमा साउदी अरब पनि तानिएको तथा हर्मुज जलमार्ग र लाल सागर हुँदै हुने जल–परिवहनमा अवरोध पुगेको अवस्थामा ३ देशले सुरक्षा सम्बन्ध सुदृढ बनाउने प्रयास गरिरहेका छन् । साउदी अरब र पाकिस्तानले गएको वर्ष संयुक्त रक्षा सम्झौताको घोषणा गरेका थिए ।

गएको फेब्रुअरी २८ मा अमेरिका र इजरायलले गरेको आक्रमणले क्षेत्रीय तनावलाई बढाएपछि इरान र उसका सहयोगीहरूले साउदी अरब तथा खाडीका अन्य देशहरूमाथि आक्रमण गर्दै आएका छन् र उनीहरूको ऊर्जा आपूर्तिमा अवरोध खडा गरिरहेका छन् ।

३ वटा देशले जारी गरेका संयुक्त विज्ञप्तिअनुसार यस सम्झौताको उद्देश्य कुनै पनि आक्रामक कार्यविरुद्ध सामूहिक प्रतिरोध क्षमता सुदृढ पार्नु हो र ३ देशमध्ये कुनै एकमाथि हुने सशस्त्र आक्रमणलाई सबैमाथिको आक्रमण मानिने व्यवस्था गरेको छ ।

टर्किएसँग उत्तर एट्लान्टिक सन्धि सङ्गठन (नेटो) को दोस्रो ठूलो सैन्य शक्ति छ । खाडी क्षेत्रको सबैभन्दा शक्तिशाली राष्ट्र साउदी अरब इस्लामका पवित्रतम् स्थलहरूको केन्द्र तथा विश्वको प्रमुख तेल निर्यातक देश हो भने पाकिस्तान आणविक हतियार सम्पन्न एकमात्र मुस्लिम राष्ट्र हो ।