जब उडिरहेको विमान अचानक ३०० फिट तल खस्यो...

गएको हप्ता आकाशमा उडिरहेको एअर इन्डियाको एउटा विमान अचानक झन्डै ३०० फिट तल खसेपछि एक पाइलटमाथि अनुसन्धान भइरहेको छ ।

यही अगस्ट महिनाको ४ तारिखमा थाइल्यान्डको फुकेटबाट दिल्लीतर्फ गइरहेको एअरबस ए–३२० विमानमा १३७ जना यात्रु र चालक दलका ८ जना सदस्य रहेका थिए । यो घटनामा २० जना यात्रु र चालक दलका ४ जना सदस्य घाइते भएका थिए ।

यसैबीच दोस्रो पटकको लागूऔषध परीक्षणमा विमानका पाइलटकाे रिपाेर्ट पोजिटिभ देखिएकाे बीबीसी हिन्दीले जनाएको छ ।

नागरिक उड्डयनमन्त्री राम मोहन नायडुले विमान दुर्घटना अनुसन्धान ब्युरो (एएआईबी) ले यस विषयमा अनुसन्धान गरिरहेको र अन्तिम प्रतिवेदन सार्वजनिक भएपछि मात्र आफूले यसबारे केही भन्न सक्ने बताउनुभएको छ ।

मन्त्री नायडुले यो विषय लागूऔषधको प्रयोगसँग जोडिएको र विद्यमान नियमहरूमा कुनै किसिमको हेरफेर वा गडबडी गरिएको पाइएमा कडा कारबाही गरिने चेतावनी दिनुभयो ।

एउआईबीले यस घटनासँग सम्बन्धित सबै सान्दर्भिक प्राविधिक, सञ्चालनगत, चिकित्सा र मानवीय पक्षहरूसँग जोडिएका प्रमाणहरूको जाँच गरिरहेको छ ।

यसैबीच हिजो नागरिक उड्डयन मन्त्रालयले फुकेट–दिल्ली उडानसँग सम्बन्धित घटनाका सन्दर्भमा सोधपुछका लागि एअर इन्डियाका निवर्तमान प्रमुख कार्यकारी अधिकृत (सीईओ) क्याम्पबेल विल्सनलाई बोलाएको थियो ।

सञ्चारमाध्यमका अनुसार उडान एआई २३७९ का मुख्य पाइलटको पुनः लागूऔषध परीक्षण हुनेछ । ती पाइलटको प्रारम्भिक परीक्षणको नतिजा नन–नेगेटिभ आएको थियो; यो एक प्रारम्भिक द्रूत परीक्षण हो र यसको नतिजालाई अन्तिम वा निश्चित मानिँदैन ।