फिलिपिन्स फेरि विश्वव्यापी विपद् जोखिम सूचीको शीर्ष स्थानमा

फिलिपिन्स ‘विश्व जोखिम सूचकाङ्क २०२६’ को शीर्ष स्थानमा रहँदै पुनः विश्वमा सबैभन्दा धेरै विपद् जोखिम भएको देश बनेको छ ।

फिलिपिन्स ४६.६९ अङ्कसहित विपद् जोखिम सूचीको शीर्ष स्थानमा रहेको प्रतिवेदनलाई उद्धृत गर्दै चिनियाँ समाचार संस्था सिन्ह्वाले जनाएको छ ।

जर्मन संस्थाहरूद्वारा प्रकाशित सूचकाङ्कले संयुक्त राष्ट्रसङ्घका सबै १९३ सदस्य देशहरूलाई समेटेको थियो । यसमा भारत ४४.९७ अङ्कसहित दोस्रो र इन्डोनेशिया ४४.६३ अङ्ककसहित तेस्रो स्थानमा रहेको छ । यो सूचीमा नेपाल २५.३७ अङ्कसहित १४६औँ स्थानमा छ ।

‘विश्व जोखिम सूचकाङ्क’ ले विपद्को जोखिमलाई कुनै पनि देश प्राकृतिक जोखिमको कति सम्पर्कमा छ र त्यसको सामाजिक संवेदनशीलता कस्तो छ भन्ने दुई मुख्य आधारमा मूल्याङ्कन गर्छ । यसमा विपद्को सामना गर्ने तथा त्यसमा अभ्यस्त हुने क्षमतासमेत समावेश हुन्छ ।

भौगोलिक अवस्थितिका कारण फिलिपिन्स निरन्तर रूपमा विपद्को उच्च जोखिममा रहेका देशहरूमध्ये पर्दै आएको छ ।

प्रशान्त महासागरीय ‘रिङ अफ फायर’ मा रहेकाले फिलिपिन्स भूकम्प र ज्वालामुखी गतिविधिका दृष्टिले जोखिमपूर्ण अवस्थामा छ । पश्चिमी प्रशान्त क्षेत्रमा यसको अवस्थितिका कारण यहाँ बारम्बार उष्णकटिबन्धीय चक्रवात, ठूलो वर्षा, बाढी र पहिरोको जोखिम रहन्छ ।