देशभर धेरैजसो निर्वाचन क्षेत्रमा आज नेपाली कांग्रेसको क्षेत्रीय अधिवेशन हुँदै

काठमाण्डौ – नेपाली कांग्रेसको १५औँ महाधिवेशनअन्तर्गत आज देशभरका धेरैजसो सङ्घीय र प्रदेश निर्वाचन क्षेत्रमा क्षेत्रीय अधिवेशन भइरहेको छ ।

बितेका केही दिनदेखिको वर्षाका कारण केही पहाडी जिल्ला र बाटो अवरुद्ध भएका क्षेत्रमा भने अधिवेशन असोज १३ गतेभित्र अनुकूलताअनुसार सम्पन्न गर्ने गरी कार्य तालिका संशोधन गरिएको कांग्रेसको केन्द्रीय निर्वाचन समितिले जनाएको छ ।

निर्वाचन समितिका सदस्य सचिव राजु कटुवालका अनुसार मौसममा सुधार आएसँगै बाँकी रहेका क्षेत्रहरूमा सोमबार र मङ्गलबारसम्ममा अधिवेशन सम्पन्न हुनेछ । आज हुने सङ्घीय निर्वाचन क्षेत्रीय अधिवेशनबाट क्षेत्रीय कार्यसमितिसहित हरेक निर्वाचन क्षेत्रबाट ३३ जनाका दरले सङ्घीय महाधिवेशन प्रतिनिधि र १२ जना महासमिति सदस्य चयन हुनेछन् ।

यस्तै प्रदेशसभा क्षेत्रीय अधिवेशनले प्रदेश कार्यसमिति र विभिन्न समावेशी आधारमा प्रदेश प्रतिनिधिहरू चयन गर्नेछ । गएको असोज ३ गते वडा अधिवेशनबाट शुरु भएको कांग्रेसको अधिवेशन शृङ्खलाअन्तर्गत वडा र पालिका अधिवेशन यसअघि नै सम्पन्न भइसकेका छन् ।

क्षेत्रीय अधिवेशन सकिए लगत्तै यही असोज १६ देखि १९ गतेसम्म काठमाण्डौको खुलामञ्चमा केन्द्रीय महाधिवेशन गर्ने गरी तयारी छ ।