दक्षिण अफ्रिकामा केही घण्टाकाे अन्तरालमा दुई ठाउँमा गोलीकाण्ड, २७ जनाको ज्यान गयाे

दक्षिण अफ्रिकामा केही घण्टाको अन्तरालमा दुई ठाउँमा गोली चल्दा कम्तीमा २७ जनाको ज्यान गएको छ । देशमा बढ्दो बन्दुक हिंसाको यो पछिल्लो घटना रहेको समाचार संस्था एएफपीले जनाएको छ ।

पहिलो घटना गएराति जोहानेसबर्ग नजिकैको बारमा भएको थियो । प्रहरीका अनुसार आठ जना सशस्त्र आक्रमणकारीले बारमा प्रवेश गरी अन्धाधुन्ध गोली चलाउँदा १७ जनाको ज्यान गयो भने अरू १५ जना घाइते भए ।

दोस्रो घटना आज बिहान केप टाउन नजिकैको एउटा बस्तीमा रहेको मनोरञ्जन केन्द्रबाहिर भएको थियो । यस घटनामा १० जनाको ज्यान गयो भने अरू ११ जना घाइते भए ।

घटनास्थलबाट भाग्नुअघि संदिग्धहरूले दुई वटा गाडीमा आगजनी गरेका प्रहरीले बताएको छ । घटनामा संलग्नहरूलाई पक्राउ गर्न अनुसन्धानकर्ता तथा विशेष प्रहरी टोली परिचालन गरिएको खबरमा उल्लेख छ ।

दक्षिण अफ्रिकामा कानूनी तथा अवैध दुवै प्रकारका हतियारको व्यापक प्रयोग हुने गरेको छ । त्यहाँ गिरोहबीचको विवाद तथा अनौपचारिक व्यवसायमा हुने प्रतिस्पर्धाका कारण गोलीकाण्डका घटना हुने गरेका छन् ।

झन्डै ६ करोड २० लाख जनसङ्ख्या रहेको दक्षिण अफ्रिकामा विश्वकै उच्च हत्या दरमध्ये एक रहेको छ । देशमा दैनिक औसत झन्डै ६० जनाको हत्या हुने गरेको तथ्याङ्क छ ।

यसै वर्षको मार्चमा जोहानेसबर्गका हिंसाग्रस्त क्षेत्रमा अपराध नियन्त्रणका लागि प्रहरीलाई सहयोग गर्न सेना परिचालन गरिएको थियो ।

राष्ट्रपति सिरिल रामाफोसाले बढ्दो अपराधलाई देशका प्रमुख चुनौतीमध्ये एकका रूपमा वर्णन गर्नुभएको छ ।