भारतीय चर्चित अभिनेता नाना पाटेकरको ७५ वर्षको उमेरमा निधन

भारतीय चलचित्रका दिग्गज अभिनेता नाना पाटेकरको ७५ वर्षको उमेरमा निधन भएको छ ।

भारतीय सञ्चारमाध्यमका अनुसार उहाँको आज बिहान गोवामा रहेको आफ्नै निवासमा निधन भएको हो ।

पाटेकरलाई गोवामा रहेको निवासमा अचेत अवस्थामा भेटिएपछि अस्पताल लगिएको थियो । चिकित्सकहरूले झण्डै ४५ मिनेटसम्म लगातार सीपीआर दिएर बचाउने प्रयास गरे पनि उहाँलाई बचाउन नसकिएको अस्पतालका चिकित्सक डा. शेखर साल्करलाई उद्धृत गर्दै द इन्डियन एक्सप्रेसले जनाएको छ ।

निधनको यकिन कारण भने पोस्टमार्टमपछि मात्रै स्पष्ट हुने खबरमा उल्लेख छ । पाटेकरको निधनले भारतीय चलचित्र क्षेत्र र उहाँका प्रशंसकलाई स्तब्ध बनाएको छ ।

सन् १९५१ जनवरी १ मा महाराष्ट्रको मुरुड–जन्जिरामा जन्मिएका विश्वनाथ पाटेकर अर्थात् नाना पाटेकरले सन् १९७८ मा ‘गमन’बाट चलचित्र क्षेत्रमा अभिनय यात्रा शुरु गर्नुभएको थियो । हिन्दी र मराठी दुवै भाषाका चलचित्रमा काम गर्नुभएका उहाँ अभिनयसँगै लेखक र निर्देशकका रूपमा पनि परिचित हुनुहुन्थ्यो ।

‘सलाम बम्बे’, ‘परिन्दा’, ‘अंगार’, ‘क्रान्तिवीर’, ‘अग्निसाक्षी’, ‘खामोशी : द म्युजिकल’, ‘गुलाम–ए–मुस्तफा’, ‘अब तक छप्पन’, ‘अपहरण’, ‘राजनीति’, ‘वेलकम’लगायत चलचित्रमा उहाँले सम्झनलायक भूमिका निर्वाह गर्नुभएको थियो ।

७५ वर्षको उमेरमा पनि पाटेकर अभिनयमा सक्रिय हुनुहुन्थ्यो । गम्भीर, खलनायक, प्रहरी, राजनीतिक पात्रदेखि हास्य भूमिकासम्मलाई आफ्नै शैलीमा प्रस्तुत गर्ने उहाँको क्षमता भारतीय चलचित्रमा अलग पहिचानका रूपमा स्थापित थियो ।

उहाँको निधनसँगै हिन्दी तथा मराठी चलचित्र क्षेत्रले एक प्रभावशाली अभिनेता गुमाएको छ ।