नेभिगेशन
सोमबार, कात्तिक ३०, २०८३

कुकुरले लखेटेपछि रुखमा चढेकाे बिरालाेकाे २२ घण्टापछि उद्धार

काठमाण्डाै – ललितपुरमा ४० फिट अग्लो रुखमा २२ घण्टादेखि अलपत्र परेको बिरालोलाई महानगरीय प्रहरीले सकुशल उद्धार गरेको छ ।

कुकुरले लखेटेपछि बिरालो जाेगिन कुपण्डोल प्रहरी बिट नजिकैको रुखमा चढेको थियो । रुखमा अलपत्र परेको बिरालोलाई ललितपुर महानगर प्रहरीको उद्धार टोलीले स्काई लिफ्ट प्रविधिको प्रयोग गरी हिजाे सकुशल उद्धार गरेको महानगरीय प्रहरी प्रमुख सीताराम हाछेथुले जानकारी दिनुभयो ।

उहाँका अनुसार रुखको फेद आसपासमै रहेका कुकुरको डरले बिरालो रुखबाट तल झर्न नसकेको हो । उद्धार गरिएको बिरालोलाई अहिले नगर प्रहरी बल एकाइ लगनखेलमा राखिएको छ ।

अग्लो घर, रुख, पहाड, बिजुलीको खम्बा, गहिरो खाल्डोमा फसेका मानिस तथा जनावरहरूलाई सुरक्षित रूपमा उद्धार गरिने एक आधुनिक यान्त्रिक प्रणाली नै स्काई लिफ्ट प्रविधि हो ।

हाछेथुका अनुसार स्काई लिफ्ट प्रविधि महानगरमा भित्रिएको दुई वर्ष भएको छ । यस अवधिमा मानिस तथा जनावर गरी ६ पटक उद्धार भएकाे छ ।

प्रकाशित मिति:
थप समाज