नेभिगेशन
सोमबार, कात्तिक ३०, २०८३

५ वर्षमा डेढ लाख रोजगारी सिर्जना गर्ने सरकारको लक्ष्य

काठमाण्डाै – सरकारले आउँदो पाँच वर्षमा हेरचाह तथा घरेलु कामको क्षेत्रबाट डेढ लाखभन्दा धेरै रोजगारी सिर्जना गर्ने योजना अघि सारेको छ ।

बालबालिका, ज्येष्ठ नागरिक, अपाङ्गता भएका व्यक्ति तथा दीर्घरोगीको हेरचाह र घरायसी कामलाई औपचारिक श्रम बजारमा जोड्दै मर्यादित रोजगारी सिर्जना गर्न लागिएको हो ।

युवा, श्रम तथा रोजगार मन्त्रालयले यही कात्तिक २० गते ‘राष्ट्रिय हेरचाह अर्थतन्त्र तथा घरेलु कार्य रोजगार कार्यक्रम’ को अवधारणा स्वीकृत गरिसकेको छ । जसअनुसार आउँदो पाँच वर्षमा केयर अर्थात् हेरचाह क्षेत्रमा एक लाख र घरेलु सहयोग क्षेत्रमा ५० हजार गरी एक लाख ५० हजार रोजगारी सिर्जना गर्ने लक्ष्य छ ।

कार्यक्रमको पहिलो वर्षमा १० हजार जनालाई तालिम दिई आठ हजारभन्दा धेरैलाई रोजगारीमा आबद्ध गराउने लक्ष्य छ ।

अन्तर्राष्ट्रिय श्रम सङ्गठन (आईएलओ) को प्राविधिक सहकार्यमा अघि बढाएको यस कार्यक्रमका लागि डिजिटल रोजगार मिलान प्लेटफर्म निर्माणको प्रक्रियासमेत शुरू भइसकेको छ ।

श्रममन्त्री रामजी यादवको सचिवालयका अनुसार पहिलो चरणमा काठमाण्डाै उपत्यकासहित पोखरा, भरतपुर, विराटनगर, धरान र बुटवललगायतका शहरमा पाइलट कार्यक्रम सञ्चालन गरिनेछ । यो कार्यक्रमले विशेषगरी महिला, युवा तथा वैदेशिक रोजगारीबाट फर्किएका श्रमिकलाई स्वदेशमै आयआर्जनसँग जोड्ने विश्वास छ ।

– न्युज एजेन्सी नेपाल

प्रकाशित मिति:
थप समाज