नेभिगेशन
सोमबार, कात्तिक ३०, २०८३

सुदूरपश्चिम र कर्णालीका केही ठाउँमा वर्षा

काठमाण्डाै – आज सुदुरपश्चिम र कर्णाली प्रदेशको केही ठाउँमा पानी परेको छ । मौसम पूर्वानुमान् महाशाखाका अनुसार पश्चिमी वायुको प्रभावले केही ठाउँमा वर्षा र हिमाली क्षेत्रमा हिमपात भइरहेको हो ।

आज राति गण्डकी प्रदेशका केही ठाउँमा पनि असिनासहित वर्षा र उच्च पहाडी तथा हिमाली क्षेत्रमा हिमपातको सम्भावना रहेको महाशाखाका मौसमविद् डेभिड ढकालले जानकारी दिनुभयो ।

उहाँका अनुसार कोशी प्रदेशका हिमाली तथा पहाडी भूभागका थोरै ठाउँमा र लुम्बिनी प्रदेशका केही ठाउँमा पनि वर्षाको सम्भावना रहेको छ । बागमती प्रदेशका हिमाली तथा पहाडी भूभागका एक/दुई ठाउँमा मात्रै वर्षा हुन सक्ने विभागको अनुमान छ ।

आज बेलुकादेखि पश्चिमी न्यून चापीय प्रणाली कमजोर हुँदै जाने र वर्षाका गतिविधि घट्ने माैसमविद् ढकालले जानकारी दिनुभयाे । आउँदा दुई दिन वर्षाका गतिविधि न्यून रहने र त्यसपछिका पाँच दिनसम्म पनि वर्षाको सम्भावना क्रमशः घट्दै जाने पूर्वानुमान रहेको उहाँले बताउनुभयो ।

मौसमविद् ढकालले धान काट्ने समय चलिरहेकाले मौसमको पूर्वानुमानमा ध्यान दिन किसानहरूलाई सुझाव दिनुभएको छ ।

प्रकाशित मिति:
थप समाज