काठमाण्डौ – ओमानमा चलिरहेको एसिसी प्रिमियर कपमा साउदी अरबले नेपाललाई ७४ रनको लक्ष्य दिएको छ । पानी परेपछि आठ ओभरमा झारिएको खेलमा साउदीले छ विकेट गुमाएर ७३ रन बनायो ।

उसका लागि अब्दुल वासिदले १६ बलमा ३७ रन बनाए । अरू कुनै खेलाडीले पनि दोहोरो अंकमा रन बनाउन सकेनन् । नेपालका करण केसी र अविनाश बोहराले सामान दुई तथा प्रतिश जिसी र ललित राजवंशीले सामान एक विकेट लिए ।

नेपाल लगातार तीन खेल जितेर समूह विजेता बनिसकेको छ । सेमिफाइनलमा पुग्न अहिलेको खेलमा साउदीले नेपाललाइ हराउनै पर्नेछ । साउदी अरब नेपालसँग हारेमा भने हङकङ सेमिफाइनलमा पुग्नेछ ।

आजै भएको अर्को खेलमा हङकङले मलेसियालाई सात  विकेटले पराजित गरेर सेमिफाइनलको आसा बढाएको छ । मलेसियाले दिएको एकसय ४१ रनको लक्ष्य हङकङले १२ ओभर एक बलमा तीन विकेट गुमाएर पूरा गर्यो ।

आज दिउँसो सवा ४ बजे ओमान र कुवेत तथा यूएई र कम्बोडिया खेल्दैछन् । सेमिफाइनलका खेल शुक्रवार, तेस्रो स्थानको खेल शनिवार र फाइनल खेल आइतवार हुनेछ । यो प्रतियोगिताको उपाधि विजेता टोलीले एशिया कप खेल्न पाउनेछ ।