काठमाण्डाै – प्रधानमन्त्री केपी शर्मा ओलीले वर्ष २०७७ समग्रमा सफल वर्ष रहेको बताउनु भएको छ ।

आज देशवासीका नाममा सम्बोधन गर्दै प्रधानमन्त्री ओलीले २०७७ राजनीतिक, आर्थिक, सामाजिक  लगायत समग्रमा सबै हिसाबले सफल रहेको बताउनु भएको हो । यो वर्ष राजनीतिक हिसाबले पृथकतावादी सोच भएकाहरुलाई राष्ट्रिय एकतामा ल्याएको उहाँले बताउनुभयो ।

‘हिंसाको बाटो लिइरहेको समूहलाई शान्तिपूर्ण राजनीतिमा फर्काउन सफल भएकाले अब देशमा हिंसाको रजानीति छैन,’ उहाँले भन्नु भएको छ ।

यस्तै, उहाँले नागरिक नै सार्वभौमसत्ता भएको  भन्दै नागरिकको अभिमत नै सबै भन्दा ठूलो भएको बताउनुभयो । यस्तै, पुनर्निर्माणका क्षेत्रमा भइरहेको उपलब्धि र मेलम्चीको पानी काठमाण्डौ ल्याउन सफल भएकाले पनि वर्ष २०७७ सफल भएको उहाँको दाबी छ ।

यस्तै प्रधानमन्त्री ओलीले सकेसम्म देश लकडाउनमा नजाे पनि बताउनुभएको छ । केहीले अब लकडाउन हुने हल्ला चलाउन थाले पनि सरकारले सकेसम्म लकडाउन नगर्ने बताउनु भएको हो ।  तर, कोरोनाको जोखिम बढिरहेकाले अवस्था र परिस्थिति हेरेर थप रणनीति बनाइने उहाँको भनाइ छ ।