आज पहाडी भेगका एक–दुई ठाउँमा ठूलो पानी पर्ने सम्भावना

काठमाण्डौ — काठमाण्डौ उपत्यका सहित देशका धेरै ठाउँमा बिहानैदेखि घाम लागेको छ ।

गएराति धेरै ठाउँमा वर्षा भए पनि अहिले भने वर्षा रोकिएको छ । मौसम पूर्वानुमान महाशाखाका अनुसार अहिले कर्णाली र सुदूरपश्चिमका पहाडी केही ठाउँमा फाट्टफुट्टबाहेक अरु ठाउँमा पानी परेको छैन ।

आज दिउँसो भने बागमती, गण्डकी, लुम्बिनी र कर्णाली प्रदेशको पहाडी भू–भागका एक–दुई ठाउँमा ठूलो वर्षाको सम्भावना रहेको महाशाखाले जनाएको छ । महाशाखाका अनुसार कोशी प्रदेशको तराई र मधेश प्रदेशका केही ठाउँमा हावाहुरीको सम्भावना छ ।

राति कोशी प्रदेशको पहाडी र हिमाली भू–भागका एक–दुई ठाउमा ठूलो पानी पर्ने सम्भावना रहेको महाशाखाले जनाएको छ । बागमती, गण्डकी, लुम्बिनी र सुदूरपश्चिम प्रदेशका तराई भू–भागका केही ठाउँ तथा मधेश प्रदेश साथै कोशी प्रदेशको तराई भू–भागका थोरै ठाउँमा मध्यमसम्म वर्षाको सम्भावना छ

 यस्तै भोलि र पर्सी पनि कोशी, बागमती, गण्डकी र लुम्बिनी प्रदेशको पहाडी भू–भागका एक–दुई ठाउँमा ठूलो पानी पर्ने सम्भावना रहेको महाशाखाले जनाएको छ ।