मधेशमा उद्यमी महिलाको संख्या बढ्दो

काठमाण्डौ — मधेस प्रदेशमा पछिल्लो समय महिला उद्योगी तथा व्यवसायीको सङ्ख्या उल्लेख्य रूपमा बढ्न थालेको छ ।

सरकारले महिलाको नाममा उद्योग तथा व्यवसाय दर्ता गर्दा दस्तुरमा ३५ प्रतिशत छुट दिने व्यवस्था गरेपछि गृहिणीहरू उद्यमी बन्ने क्रम बढेको हो ।

अहिले घरेलु तथा साना उद्योग कार्यालयमा दर्ता हुने नयाँ व्यवसायमध्ये झण्डै ७० प्रतिशत महिलाकै नाममा हुने गरेका छन् । धनुषाकी अम्बिका श्रेष्ठ र सुनिता साहजस्ता धेरै महिलाहरू अहिले आफैँ मालिक बनेर जेनरल स्टोर्स, फेन्सी, सिलाइकटाइ र कृषिजन्य उद्योगहरू सफलताका साथ चलाइरहेका छन् ।

गएको आर्थिक वर्ष २०८२/८३ मा मधेस प्रदेशका आठ जिल्लामा ५ हजार ६८ नयाँ उद्योग र ६ हजार १४० भन्दा बढी वाणिज्य फर्म दर्ता भएका छन् । यस अवधिमा ४ हजार ८७८ जना महिलाले प्रत्यक्ष रोजगारी समेत पाएका छन्, जसमा सबैभन्दा बढी बारा र पर्साका महिलाहरू रहेका छन् ।

दर्ता शुल्कमा छुट, बैंकिङ ऋणमा सहजता र स्थानीय प्रशासनको सक्रियताका कारण महिलाहरू व्यापार–व्यवसायतर्फ आकर्षित भएका हुन् । यसले महिला सशक्तीकरणसँगै मधेसको सामाजिक रुपान्तरणमा ठूलो योगदान पुर्‍याएको छ ।