भोटेकोशी बाढीपीडितको उद्धार र राहतमा देश–विदेशबाट सहयोग

काठमाण्डौ – रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि देश–विदेशबाट सहयोग जुट्न थालेको छ ।

सरकारले प्रभावित क्षेत्रलाई तीन महिनाका लागि विपद् संकटग्रस्त क्षेत्र घोषणा गर्दै उद्धार, राहत र पुनःस्थापनालाई तीव्रता दिएको छ । गैरआवासीय नेपाली संघ (एनआरएनए)ले बाढीपीडितका लागि तत्काल ५ करोड रुपैयाँ सहयोग गर्ने घोषणा गर्दै चिकित्सक टोलीमार्फत प्राथमिक उपचार, स्वास्थ्य परीक्षण र औषधि वितरण गर्ने जनाएको छ ।

एक्स्ट्रिम इनर्जी ड्रिंक्सले प्रधानमन्त्री दैवीप्रकोप उद्धार कोषमा १ करोड तथा राष्ट्रिय स्वतन्त्र पार्टीले ५० लाख रुपैयाँ सहयोग गर्ने निर्णय गरेका छन् । अन्तर्राष्ट्रियस्तरमा पनि सहयोगको प्रतिबद्धता आएको छ ।

विश्व बैंकका नेपाल निर्देशक डेभिड सिस्लेनले उद्धार तथा पुनर्निर्माणका लागि विभिन्न स्रोतबाट झण्डै २५ अर्ब रुपैयाँसम्म आपत्कालीन सहयोग उपलब्ध हुन सक्ने बताउनु भएको छ । भारतले १० टन मानवीय सहायता, राहत सामग्री र अत्यावश्यक औषधि पठाएको छ भने चीनले तत्काल आर्थिक सहयोग गर्ने प्रतिबद्धता जनाएको छ ।

नेपाल र चीनका मौसमसम्बन्धी निकायबीच जोखिमपूर्ण मौसम तथा बाढीको पूर्वसूचना आदानप्रदान थप प्रभावकारी बनाउने सहमति भएको छ । अमेरिकाले पनि उद्धार तथा राहतमा सहयोग गर्न तत्पर रहेको जनाएको छ ।

नेपाली कांग्रेस, नेकपा एमाले, नेकपा, राष्ट्रिय प्रजातन्त्र पार्टी, श्रम संस्कृति पार्टी लगायत दलले नेता–कार्यकर्ता परिचालन गरी उद्धार तथा राहतमा सहयोग गर्ने बताएका छन् । 

यस्तै सरकारले बाढी प्रभावित नागरिकको उद्धार, राहत तथा पुनःस्थापनाका लागि प्रधानमन्त्री दैवीप्रकोप उद्धार कोष तथा प्रधानमन्त्री राहत कोषमा आफ्नो क्षमता अनुसार आर्थिक सहयोग गर्न देश–विदेशमा रहेका व्यक्ति तथा संस्थालाई अपिल गरेको छ ।