चीनमा विदेशी लगानीको स्वरूप बदलिँदै

चीनमा चालु वर्षको पहिलो आठ महिनामा समग्र विदेशी प्रत्यक्ष लगानी घटेको भए पनि उच्च प्रविधिसँग सम्बन्धित उद्योगमा भने विदेशी लगानी उल्लेख्य रूपमा बढेको छ । 

चीनको वाणिज्य मन्त्रालयका अनुसार जनवरीदेखि अगस्टसम्म उच्च प्रविधि उद्योगमा वास्तविक रूपमा प्रयोग भएको विदेशी लगानी ३५ दशमलव १ प्रतिशतले बढेको छ । यो अवधिमा कुल ४२ हजार ५८२ वटा नयाँ विदेशी लगानी भएका उद्यम स्थापना भएका छन् । 

यद्यपि, चीनमा वास्तविक रूपमा प्रयोग भएको कुल विदेशी प्रत्यक्ष लगानी ५ दशमलव ३ प्रतिशतले घटेर ४७९ अर्ब ९५ करोड युआन कायम भएको छ । यसले चीनमा समग्र विदेशी लगानीको प्रवाह केही कमजोर भए पनि उच्च प्रविधि, अनुसन्धान तथा विकास र उन्नत उत्पादनजस्ता क्षेत्रमा विदेशी लगानीकर्ताको चासो बढिरहेको देखाउँछ । 

विज्ञहरूका अनुसार चीनको आकर्षण पहिले मुख्यतः कम लागतमा आधारित थियो भने अहिले नवप्रवर्तन र उच्चस्तरीय प्रविधिमा आधारित बन्दै गएको छ । यसैबीच, चीनले विदेशी लगानीलाई थप आकर्षित गर्न १५ बुँदे कार्य योजना सार्वजनिक गर्नुका साथै फ्रान्स, स्विट्जरल्यान्ड र दक्षिण कोरियाबाट भित्रिने लगानीमा समेत उल्लेख्य वृद्धि भएको जनाएको छ ।