अमेजनले सन् २०३० सम्ममा भारतमा ४ खर्ब ६० अर्ब रुपैयाँ लगानी गर्ने

विश्वकै सबैभन्दा ठूलो अमेरिकी ‘ई–कमर्स’ कम्पनी अमेजनले सन् २०३० सम्ममा भारतमा आफ्नो ‘क्विक कमर्स’ अर्थात् छिटो डेलिभरी सेवा व्यवसाय विस्तार गर्न ३ अर्ब अमेरिकी डलर अर्थात् ४ खर्ब ६० अर्ब रुपैयाँ लगानी गर्ने भएको छ ।

अमेजनले सन् २०२७ को अन्त्यसम्ममा छिटो डेलिभरी सेवा क्षेत्रमा १ अर्ब डलर र सन् २०३० सम्ममा थप २ अर्ब डलर लगानी गर्ने योजना बनाएको समाचार संस्था रोयटर्सले  जनाएको छ । यस प्रस्तावित लगानीबारे यसअघि कुनै जानकारी सार्वजनिक भएको थिएन ।

यस क्षेत्रमा अमेजनको यो अहिलेसम्मकै ठूलो लगानी हो । यस क्षेत्रमा प्रतिस्पर्धीहरूले केही मिनेटमै सामान डेलिभरी गर्ने सेवालाई लोकप्रिय बनाएर अग्रता लिइसकेका समाचार संस्था रोयटर्सले जनाएको छ ।

भारतमा तत्काल डेलिभरी गर्ने क्षेत्र तीव्र गतिमा बढिरहेको छ । यसले शहरी क्षेत्रका भारतीयहरूले दूध र चकलेटदेखि लिएर आईफोन र विद्युतीय उपकरणसम्मका सामानहरू खरिद गर्ने तरिकालाई नै परिवर्तन गरिदिएको छ; जबकि पहिले यस्ता सामानहरू केवल खुद्रा पसल वा ठूला ई–कमर्स वेबसाइटहरूबाट मात्र किनिन्थ्यो र तिनको डेलिभरीमा समय लाग्थ्यो ।

भारतको ई–कमर्स क्षेत्रमा वर्चस्व जमाएका फ्लिपकार्ट र अमेजन छिटो डेलिभरी सेवाको क्षेत्रमा भने ढिलो गरी प्रवेश गरेका हुन् ।

‘डेटम इन्टेलिजेन्स’ का अनुसार भारतको 'क्विक कमर्स' क्षेत्र १९ अर्ब डलरको छ र सन् २०३० सम्ममा दाेब्बरभन्दा धेरैले वृद्धि भई ४१ अर्ब डलर पुग्ने अनुमान छ ।