तिहारको अवसरमा मुस्ताङमा पर्यटकको आगमन बढ्यो

काठमाण्डौ - तिहार बिदाको अवसरमा हिमाली जिल्ला मुस्ताङमा स्वदेशी तथा विदेशी पर्यटकको आगमन बढेको छ । 

दशैँअघि मौसम प्रतिकूलताका कारण कम पर्यटक भित्रिए पनि तिहार नजिकिएसँगै मौसम अनुकूल बनेपछि पर्यटकको सङ्ख्यामा उल्लेख्य वृद्धि भएको हो । जिल्ला प्रहरी कार्यालय मुस्ताङका अनुसार कात्तिक १ देखि १५ गतेसम्म मात्रै ३५ हजार ८५८ जना पर्यटक मुस्ताङ भित्रिएका छन्, जसमा स्वदेशी पर्यटकको सङ्ख्या दुई तिहाइभन्दा बढी अर्थात् २७ हजार १०७ रहेको छ । 

यस्तै, आठ हजार ७५१ जना विदेशी पर्यटकले मुस्ताङको भ्रमण गरेका छन् । लामो बिदाका कारण स्कुल, कलेजका विद्यार्थी र राष्ट्रिय तथा अन्तर्राष्ट्रिय पर्यटकको रोजाइमा मुस्ताङ परेको हो । चिसो बढे पनि छठ पर्वसम्म सरकारी बिदा हुने भएकाले पर्यटकको आगमन जारी रहने पर्यटन व्यवसायीहरूको अपेक्षा छ । 

मुस्ताङ पुग्ने अधिकांश पर्यटक मुक्तिनाथ मन्दिरको दर्शनका साथै उत्तरी कोरला नाका, लोमान्थाङ, कागबेनी, मार्फा र विभिन्न पर्यटकीय स्थलहरूको अवलोकन गरी फर्किने गरेका छन् ।