काठमाण्डौ – प्रधानमन्त्री एवं नेपाल कम्युनिस्ट पार्टी (नेकपा) का अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच बालुवाटारमा छलफल चलिरहेको छ । उहाँहरुबीच कर्णाली प्रदेशका मुख्यमन्त्री महेन्द्रबहादुर शाहीविरुद्ध परेको अविश्वासको प्रस्तावबारे छलफल भइरहेको अध्यक्ष प्रचण्डका प्रेस सल्लाहकार विष्णु सापकोटाले जानकारी दिनुभयो ।

अविश्वासको प्रस्ताव फिर्ता गर्न भन्दै अध्यक्ष प्रचण्ड साेमबारदेखि नै नेताहरुसँगको छलफलमा व्यस्त हुनुभएको छ । प्रधानमन्त्री ओलीसँग छलफल गरेर जतिसक्दो छिटो प्रस्ताव फिर्ता गर्न निर्देशन दिन लागिएको नेकपा स्रोतले जनाएको छ ।

पार्टीका वरिष्ठ नेता माधवकुमार नेपालले आफ्ना समूहका नेतालाई प्रस्ताव फिर्ता गर्न निर्देशन दिइसकेको र अध्यक्ष प्रचण्डले पनि पूर्वमाओवादीका नेताहरुलाई त्यसैअनुसारको आग्रह गरिसक्नु भएकोले अविश्वासको प्रस्ताव फिर्ता हुने सम्भावना बढेको नेकपा कर्णाली प्रदेशका नेताहरुले बताएका छन् ।