भारतीय कुखुरा र चल्लाको अवैध तस्करी नियन्त्रण गर्न माग गर्दै माइतीघरमा प्रदर्शन

काठमाण्डौ — भारतीय कुखुरा र चल्लाको अवैध तस्करी नियन्त्रण गर्न तथा पोल्ट्री किसानको लगानी संरक्षणको माग गर्दै किसानले प्रदर्शन गरेका छन् ।

देशभरका कुखुरापालक किसानले काठमाण्डौको माइतीघर मण्डलामा प्रदर्शन गरेका हुन् । उत्पादनको मूल्य निर्धारण गर्ने अधिकार किसानलाई नै दिनुपर्ने र लागत, जोखिम तथा लगानीका आधारमा न्यूनतम समर्थन मूल्य कायम गर्नुपर्ने उनीहरूको माग छ ।

भारतबाट भइरहेको कुखुरा र चल्ला तस्करी सरकारले नियन्त्रण गर्न नसक्दा आफूहरूले न्यूनतम बजार मूल्यसमेत पाउन नसकेको कुखुरापालक किसानको गुनासो छ ।

किसानका समस्या, गुनासो र सुझाव सुन्न छुट्टै आयोग वा संयन्त्र गठन गर्नुपर्ने, देशभरका किसानले दैनिक वास्तविक बजार मूल्य थाहा पाउने पारदर्शी सूचना प्रणाली लागू गर्नुपर्ने आन्दोलनरत कुखुरापालक किसानको माग छ ।