यथास्थितिमा एमाले अगाडि बढ्न नसक्ने कार्यदलको स्पष्ट निष्कर्ष (प्रतिवेदनको पूर्णपाठ सहित)

काठमाण्डौ – नेकपा एमालेको पुनर्गठन र सुदृढीकरणका लागि गठित कार्यदलले पछिल्लो विधान अधिवेशनबाट हटाइएका ’७० वर्षे उमेर हद’ र मुख्य पदमा ’बढीमा दुई कार्यकाल’ को व्यवस्था पुनः लागू गर्न प्रस्ताव गरेको छ ।

महासचिव शंकर पोखरेलले तयार पारेर कार्यदलका संयोजक रामबहादुर थापालाई बुझाएको ६५ पृष्ठ लामो प्रतिवेदनमा एमाले वर्तमान यथास्थितिमा अगाडि बढ्न नसक्ने स्पष्ट निष्कर्ष निकालिएको छ ।

प्रतिवेदनमा पार्टी अध्यक्ष केपी शर्मा ओलीले पछिल्लो राजनीतिक परिस्थिति र चुनावको परिणामलाई आत्मसात् गर्दै नयाँ नेतृत्वका लागि बाटो खुला गरिदिनुपर्ने सुझाव दिइएको छ । प्रतिवेदन सार्वजनिक भएसँगै एमालेभित्र आन्तरिक बहस र तरङ्ग पैदा भएको छ ।

प्रतिवेदनमा विगतका गल्ती र कमजोरीहरू सच्याउँदै सुदृढ पार्टी निर्माणमा जुट्न आग्रह गरिएको छ । विशेष महाधिवेशन वा पुनर्गठनको माग गर्नु अनुशासनहीनता नभई पार्टी बचाउने प्रयास भएको समेत प्रतिवेदनमा उल्लेख छ ।

एमालेले फागुन २१ को चुनावमा पराजय भोग्नुका कारण र आउँदा दिनमा पार्टीले लिनुपर्ने नीतिबारे पनि प्रतिवेदनमा उल्लेख छ । त्यस्तै, चुनावमा उम्मेदवार चयन गर्दा तल्ला कमिटीको सिफारिस वा संगठित सदस्यहरूबीच आन्तरिक चुनाव गराएर लोकप्रिय पात्र छान्ने प्रस्ताव समेत गरिएको छ । प्रतिवेदनमा एमालेप्रति नागरिकको असन्तुष्टिका ७ कारण उल्लेख गरिएका छन् ।

यद्यपि, अध्यक्ष ओली भने प्रतिवेदनका कतिपय निष्कर्षहरूप्रति असन्तुष्ट रहँदै आउनुभएको छ । कार्यदलको यो प्रतिवेदन सार्वजनिक भएपछि अब एमालेको आगामी बैठक र आन्तरिक रणनीति कुन दिशामा अघि बढ्छ भन्ने विषयलाई चासोका साथ हेरिएको छ ।