विश्वमा गरिबी बढ्दा नेपालमा भने गरिबको सङ्ख्या र दर दुवैमा उल्लेख्य कमी

काठमाण्डाै – विश्वभर गरिबीको दर बढ्दै जाँदा नेपालले भने बहुआयामिक गरिबी न्यूनीकरणमा उल्लेखनीय सफलता हासिल गरेको छ ।

संयुक्त राष्ट्रसङ्घीय विकास कार्यक्रम (यूएनडीपी) र अक्सफोर्ड विश्वविद्यालयले सार्वजनिक गरेको ‘ग्लोबल मल्टिडाइमेन्सनल पोभर्टी इन्डेक्स २०२६’ प्रतिवेदनअनुसार नेपाल गरिबीको दर र कुल सङ्ख्या दुवै घटाउन सफल सीमित देशहरूको सूचीमा परेको हो ।

दक्षिण एशियाली क्षेत्र अझै पनि उच्च गरिबीको जोखिममा छ । छिमेकी देशहरू भारत, पाकिस्तान र अफगानिस्तानमा जनसङ्ख्या वृद्धिका कारण गरिबको कुल सङ्ख्यामा अपेक्षित सुधार हुन सकेको छैन । तर नेपालले भने स्वास्थ्य, शिक्षा र जीवनस्तरका सूचकहरूमा सुधार गर्दै गरिबीको दर र गरिब मानिसको सङ्ख्या दुवैमा उल्लेख्य कमी ल्याएको छ ।

पछिल्लो १५ वर्षमा नेपालसहित ३३ वटा देशले बहुआयामिक गरिबीको अनुपात आधा घटाउन सफल भएका छन् । चीन र भियतनामजस्ता एशियाली देशहरूले गरिबी निवारणमा तीव्र प्रगति गर्दा नेपाललाई पनि गरिबी न्यूनीकरणमा द्रूत गतिमा सुधार गरिरहेको देशका रूपमा प्रस्तुत गरिएको छ ।

प्रतिवेदनअनुसार सन् २०१० यता पहिलो पटक विश्वव्यापी रूपमा तीव्र बहुआयामिक गरिबीमा बाँचिरहेका मानिसको सङ्ख्या बढेर १ अर्ब २० करोड पुगेको छ । अघिल्लो वर्षको तुलनामा गरिबको सङ्ख्या ५ करोड १५ लाखले बढेको हो ।

जनसङ्ख्या वृद्धि, जलवायु परिवर्तन र आर्थिक सङ्कटका कारण विश्वव्यापी गरिबी बढेको प्रतिवेदनमा उल्लेख छ ।