कैलाली – कैलालीमा आफ्नै सहकर्मीको सामूहिक बलात्कारपछि हत्या गरेको आरोपमा ५ जना पक्राउ परेका छन् । 

पक्राउ पर्नेमा गौरीगंगा नगरपालिका –११, शिवपुरका ३० वर्षका गणेश बडु्वाल, २७ वर्षका मनोज बोगटी, २१ वर्षका सुरज चौधरी, २० वर्षका भुवन खाती र १९ वर्षका तपेन्द्र बोगटीलाई प्रहरीले पक्राउ गरी आज सार्वजनिक गरेको हो ।

उनीहरुले गएको असार १२ गते ठाउँकी २१ वर्षीय माया विकलाई बलात्कार गरी हत्या गरेका प्रहरीको दावी छ । 

मृतक माया बिक र पक्राउ परेका गणेश बडुवाल र सुरज चौधरी गौरीगंगा गाउँपालिकामा सामाजिक परिचालक थिए ।

असार १२ गते काम सकेरसँगै फर्कने क्रममा चपरथली सामुदायिक वनभित्र लगेर उनीहरुले मायालाई सामूहिक बलात्कार गरेका थिए । 

दुई दिनसम्म माया घर नआएपछि परिवारले माया हराएको उजुरी १४ गते प्रहरीमा गरेका थिए । खोजतलासको क्रममा मायाको शव चपरथली सामुदायिक वनभित्र फेला परेको थियो ।