दाङ - घोराही उपमहानगरपालिका–१ उपल्लो मालेबासीमा तार र पाेल टाँगेकाे एक वर्ष बितिसक्दा पनि स्थानीयले बिजुली बाल्न पाएका छैनन्। बिजुली बाल्न मिटर बक्स नपाउँदा झण्डै ६० घरपरिवारले बत्ती बाल्न नपाएका हुन् ।

बिजुली नहुँदा अँध्यारोमा बस्नुपर्ने र मोबाइल चार्ज गर्न एक घण्टा उकालो/ओरालो गरी सिमलतारा बजारमा पुग्नुपर्ने बाध्यता रहेको स्थानीय बासिन्दाको गुनासो छ । 'पोल र तार तानेको वर्ष बित्यो तर बिजुली नबल्दा देखाउनकै लागि पोल र तार तानेको जस्तै भयाे।' मालेगाउँकी धनी तिवारीले बताउनुभयो ।

बत्ती बाल्ने आशामा घरमा वाइरिङ गरी मिटर बक्सका लागि २५ सय रुपैयाँ दिइसके पनि मिटर बक्स पाउन नसकेको स्थानीयको गुनासो छ । मिटर बक्स नराखेकाले बत्ती दिन नसकेको विद्युत् कार्यालयले बताउने गरेको मालती पुनले बताउनु भयाे। 

‘गाउँमा विद्युत् आएपछि खुशी लागेको थियो । तर पोल गाड्न एक वर्ष लाग्यो । गएकाे वर्ष तार तानेपछि बत्ती आयो तर बाल्न पाएका छैनौँ’ पुनले भन्नुभयो– ‘जसले गर्दा मोबाइल चार्ज गर्नसमेत एक घण्टा हिँडेर सिमलतारा जानुपर्ने बाध्यता रहेको छ।’