बाढीबाट रसुवा, नुवाकोट र धादिङमा धेरै क्षति

काठमाण्डौ – रसुवाको भोटेकोशी हुँदै त्रिशूली नदीमा एक्कासी आएको बाढीले रसुवा, नुवाकोट र धादिङमा ठूलो क्षति गरेको छ । रसुवागढी नाकाका लगभग सबै संरचना ध्वस्त बनाउनुका साथै टिमुरे र स्याफ्रुबेँसी बस्ती बगाएको छ ।

नुवाकोटको बेत्रावती, त्रिशूलीबजार, देवघाट तथा बट्टार क्षेत्रमा पनि क्षति भएको छ । यस्तै विदुर नगरपालिकाका वडा नम्बर १, ४, ५, ६, ९ र १०, बेलकोटगढी नगरपालिकाका वडा नम्बर ५, ७ र ८ तथा तारकेश्वर गाउँपालिकाका वडा नम्बर २ र ४ प्रभावित भएका छन् । आठवटा सरकारी कार्यालय पूर्ण रूपमा बगरमा परिणत गरेको छ भने एउटा विद्यालय भवन बगाएको छ ।

यस्तै धादिङको फुर्केखोला पुल बगाएपछि सदरमुकाम धादिङबेँसी पृथ्वी राजमार्ग तथा मुख्य शहरसँग सम्पर्कविच्छेद भएको छ । बाढीले धादिङको बैरेनी बजार, महेश दोभान, गलौदी, बिहानी पेट्रोल पम्प डुबानमा परेका छन् ।

बाढीले रसुवाको मितेरी पुलदेखि धादिङको मलेखुसम्मका दर्जनौँ सानाठूला पुल भत्काएको छ । नेपाल विद्युत् प्राधिकरणको तथ्यांकअनुसार १११ मेगावाटको रसुवागढी, ७८ मेगावाटको सान्जेन, ६० मेगावाटको माथिल्लो त्रिशूली– ३ ए, ४२.५ मेगावाटको सान्जेन, २४ मेगावाटको त्रिशूली, २२ मेगावाटको चिलिमेलगायत ४३१ मेगावाटका १२ विद्युत् आयोजना क्षतिग्रस्त भएका छन् ।

त्यस्तै, निर्माणाधीन ४७० मेगावाटका १५ आयोजनामा पनि बाढीले क्षति पुर्याएको छ । बाढीले रसुवाको स्याफ्रुबेँसी, नौमुरे र टिमुरेमा रहेका विभिन्न नौवटा बैंकका शाखा कार्यालय पनि बगाएको छ ।