लमजुङ – दोर्दी खोलामा गएको बुधबार दिउँसो आएको बाढीले बगाउँदा ज्यान गुमाएका पाँच जनाकै सनाखत भएको छ । 

जिल्ला प्रहरी कार्यालय लमजुङका प्रहरी निरीक्षक वसन्त पाण्डेका अनुसार बाढीले बगाएर ज्यान गुमाउनेमा पर्साका शिवधन चौधरी, डडेल्धुराका रमेश बुढा, सप्तरीका भुवनेश्वर चौधरी र बाराका सइद अन्सारी रहेका छन् ।

यसैगरी बाढीले बगाउँदा भोजपुरका दिवस कटुवालको पनि ज्यान गएको प्रमुख जिल्ला अधिकारी डा. डिजन भट्टराईले जानकारी दिनुभयो । उहाँका अनुसार कटुवालको शव बिहीबार गोरखाको पालुङटार नगरपालिका-५ को मर्स्याङ्दी नदी किनारामा भेटिएको हो ।

प्रमुख जिल्ला अधिकारी भट्टराईका अनुसार मृतकको शव पोष्टमर्टमपछि  सम्बन्धित आफन्तलाई बुझाइएको छ । दोर्दी खोलामा आएको बाढीमा बगेर ५ जनाको ज्यान गएको छ भने अझै ५ जना बेपत्ता छन् । ‘बेपत्ताहरुको खोजी कार्य भैरहेको छ', उहाँले भन्नुभयो, ‘खोजी कार्यका लागि नदी किनारामा नेपाल प्रहरी, सशस्त्र प्रहरी र नेपाली सेना खटिएको छ ।’ 

उद्धार गरी उपचारमा रहेका ८ जनामध्ये १ जनाको अस्पतालबाट ‘डिस्चार्ज’ भएको छ । ३ जना उपचारका लागि आफूखुशी काठमाण्डाै गएका छन् । बाँकी ४ जनाको जिल्ला सामुदायिक अस्पताल लमजुङमा उपचार भैरहेको छ । 

बाढीले दोर्दी करिडोरमा निर्माणाधीन विभिन्न जलविद्युत आयोजनाका महत्वपूर्ण सामानहरु बगाएको बताइएको छ ।