काठमाण्डाै – अर्थमन्त्री डा. प्रकाशशरण महतले उद्योगको बिजुली लाइन काट्ने विद्युत् प्राधिकरणको निर्णयमा पुनर्विचार हुनुपर्ने बताउनुभएको छ ।

अर्थमन्त्री महतले उद्योग व्यवसायका साथै समग्र अर्थतन्त्र नै कमजोर रहेकाे समयमा प्राधिकरणले लिएको अप्रिय निर्णय पुनर्विचार गर्नुपर्ने बताउनुभएको हो । उहाँले विभिन्न उद्योगमा भइरहेको अहिलेको दबाबलाई सोचेर मात्रै काम गर्नुपर्ने आवश्यकता रहेको बताउनुभयो ।

न्युज एजेन्सी नेपालसँग चितवनमा कुरा गर्दै अर्थमन्त्रीले लोडशेडिङ हुँदा दिएको डेडिकेटेड लाइनबारेकाे विवादलाई लिएर उद्योगको बिजुली काट्ने कुरामा प्राधिकरणले पुनर्विचार गर्नुपर्ने बताउनुभयो । उद्याेगले तिर्नुपर्ने रकम कति हो भन्ने कुराको टुङ्गाे लागेपछि यस्ताे निर्णय लिन उपयुक्त हुने उहाँकाे भनाइ छ ।

उहाँले भन्नुभयो, ‘लाेडशेडिङ हुने गरेकाे समयमा उद्याेगलाई डेडिकेटेड लाइन दिइएकाे थियाे । त्यसबापत उद्याेगले तिर्नुपर्ने रकमकाे निर्क्याेल गरेर मात्र प्राधिकरणले यस्ताे निर्णय लिनुपर्छ । अहिले सिमेन्ट लगायत विभिन्न उद्योगमा दबाब भइरहेको अवस्थामा विचार पुर्‍याएर काम गर्नुपर्छ । कानुन, व्यवस्थाअनुसार तिर्नैपर्ने कुरा त तिर्नुपर्दैन भन्ने हुँदैन ।’

अर्थमन्त्री महतले सरकारले अफ्ठ्यारो परेकाे बेलामा उद्योगी व्यवसायीलाई राहत दिनुपर्ने बताउनुभयो । 

डेडिकेटेड र ट्रङ्कलाइन जोडेबापतको बिल नतिरेको भन्दै विद्युत् प्राधिकरणले नौ वटा उद्योगको लाइन काटेको छ ।